SpaceX blen spektër frekuencash, Starlinku bëhet operator celular në SHBA

SpaceX njoftoi të enjten një marrëveshje për blerjen e licencave kombëtare për përdorimin e frekuencave në brezin e ulët, duke avancuar planet për ta shndërruar Starlink Mobile në një operator të madh celular në SHBA përmes një rrjeti që kombinon shërbimet satelitore dhe tokësore, transmeton Anadolu.

Marrëveshja përfshin deri në 14 megaherc të spektrit të çiftuar në brezin 800 MHz, bëri të ditur kompania në një deklaratë. Blerja mbetet në pritje të miratimit përfundimtar nga Komisioni Federal i Komunikimeve (FCC).

SpaceX tha se ky spektër do të ndihmojë në kapërcimin e një pengese të rëndësishme teknike, pasi sinjalet do të mund të depërtojnë përmes pengesave, siç janë muret, duke mundësuar mbulim edhe brenda ndërtesave. Sipas kompanisë, shumica e pajisjeve celulare ekzistuese tashmë e mbështesin këtë brez frekuencash.

Frekuencat e brezit të ulët do të plotësojnë spektrin global të Starlink Mobile në brezin e mesëm prej 2 GHz, të cilin kompania planifikon ta përdorë për të ofruar kapacitet më të madh të transmetimit të të dhënave në SHBA.

Pas marrjes së miratimit rregullator, SpaceX planifikon të kombinojë rrjetin e saj të satelitëve që komunikojnë drejtpërdrejt me pajisjet celulare me infrastrukturën tokësore, për të ofruar lidhje brenda dhe jashtë ndërtesave, si dhe në zonat pa mbulim celular.

Veçmas, SpaceX tha se këtë javë FCC miratoi kërkesën për vendosjen e konstelacionit të satelitëve Starlink Mobile të gjeneratës së ardhshme, duke autorizuar lëshimin e 15 mijë satelitëve të optimizuar për funksionim global në spektrin prej 2 GHz.

Kompania tha se satelitët V2 Starlink Mobile do të ofrojnë kapacitet transmetimi të të dhënave më shumë se 100 herë më të madh se gjenerata aktuale, duke mundësuar lidhje me shpejtësi të lartë drejtpërdrejt me pajisjet celulare standarde, pa pasur nevojë për modifikime.

Sipas SpaceX, FCC autorizoi përdorimin e brezave shtesë të frekuencave të komunikimit, të cilat do t'u mundësojnë satelitëve të përdorin rrjetin ekzistues të stacioneve tokësore të komunikimit të Starlinkut.