Sulm ndaj një tregu në Idlib, 10 të vdekur

IDLIB (AA) - Sipas informacioneve paraprake njoftohet se në sulmin ajror ndaj një tregu në qarkun Binnish të Idlibit të kryer nga avioni luftarak i ushtrisë së Sirisë kanë humbur jetën 10 persona, ndërsa janë plagosur 25 të tjerë, raporton Anadolu Agency (AA).

Zyrtari i mbrojtjes civile në Binnish, Muhammed Ali, në deklaratën e tij për gazetarin e AA-së tha se një avion luftarak i ushtrisë ka bombarduar një treg në qarkun Binnish, i cili gjendet në lindje të Idlibit dhe është nën kontrollin e opozitarëve.

Nga sulmi kanë humbur jetën 10 civilë dhe janë plagosur 25 të tjerë, mes tyre fëmijë dhe gra. Muhammed Ali bëri të ditur se me ndihmën e mbrojtjes civile dhe ekipeve shëndetësore të plagosurit janë dërguar në spitalet e zonës.

Ai gjithashtu shtoi se gjendja e disa të plagosurve është serioze.