Riyaz Khaliq
19 Qershor 2020•Përditësim: 19 Qershor 2020
Australia sot bëri të ditur se po përballet me një sulm të madh kibernetik, por nuk ka pranuar të fajësojë zyrtarisht Kinën për këtë, transmeton Anadolu Agency (AA).
Kryeministri i Australisë, Scott Morrison tha se organizata dhe biznese publike dhe private "aktualisht janë në shënjestër të një hakeri të sofistikuar që ndodhet jashtë shtetit", raportoi ABC news.
Ai nuk emëroi hakerin. Megjithatë, raporti citoi "burime të larta" të cilat thanë se besohet se pas sulmit qëndron Kina.
"Ky aktivitet ka shënjestruar organizatat australiane në një varg sektorësh, përfshirë të gjitha nivelet e qeverisë, industrisë, organizatave politike, arsimit, shëndetësisë, ofruesit e shërbimeve thelbësore dhe operatorët e infrastrukturat e tjera kritike", tha Morrison.
"Ajo që mund të konfirmoj është se nuk ka një numër të madh aktorësh të shteteve që mund të përfshihen në këtë lloj aktiviteti", tha ai.
"Ne e dimë se ai është një aktor i sofistikuar kibernetik i një shteti për shkak të shkallës dhe natyrës së synimeve dhe shkathtësive të përdorura", shtoi ai.
Duke i përshkruar sulmet si "dashakeqe", kryeministri australian, megjithatë tha se nuk kishte pasur shkelje në shkallë të gjerë të informacioneve personale të njerëzve.
"Kjo është arsyeja pse ne po e shtrojmë këtë çështje sot", tha Morrison.
"Për të rritur ndërgjegjësimin e kësaj çështjeje të rëndësishme, për të inkurajuar organizatat, veçanërisht ato të shëndetësisë, infrastrukturës kritike dhe shërbimet thelbësore, të marrin këshilla të ekspertëve dhe të zbatojnë mbrojtje teknike për të penguar këso lloj veprimtarish të dëmshme kibernetike", shtoi ai.
Kryeshefja ekzekutive e Qendrës së Kërkimit Bashkëpunues të Sigurisë Kibernetike, Rachael Falk nuk pranoi të emërojë asnjë vend, duke thënë se përshkrimi i fajësimit është një "shpërqendrim i vëmendjes".
"Nuk ka rëndësi se nga vjen, të jem i sinqertë me ty", tha ajo. "Ky mesazh, kryeministri, ishte i qartë. Bëni atë që duhet të bëni për të mbrojtur biznesin tuaj të vlefshëm dhe të dhënat personale. Kërcënimet vijnë nga kudo, çdo ditë të javës", tha Falk.
