Një aksident i rëndë ka ndodhur në një teleferik në vendpushimin spanjoll të skive Astun, pranë kufirit me Francën, duke lënë të plagosur të paktën 30 persona, transmeton Anadolu.

Sipas raportimeve të para, autoritetet njoftuan se nëntë persona janë në gjendje kritike për jetën dhe tetë të tjera janë plagosur rëndë.

Ende nuk dihet shkaku i aksidentit, por sipas gjetjeve fillestare, rrota që mbante kabllon prej çeliku të teleferikut është shkëputur.

“Duket sikur kablloja u lirua, teleferiku u lëkund dhe njerëzit po binin prej tij”, thanë dëshmitarët okularë.

Vendpushimi i skive është mbyllur menjëherë pas aksidentit dhe po zhvillohet një operacion i gjerë shpëtimi për transportimin e të plagosurve në spitalet e afërta me ambulancë dhe helikopter.

Rreth 80 persona janë ende të bllokuar në teleferik.

Vendpushimi i skive Astun, i cili është i popullarizuar kryesisht nga skiatorë spanjollë, ndodhet afër kufirit me Francën në malet Pyrenees.