Tre ish-presidentë amerikanë bashkohen për të ndihmuar refugjatët afganë

Tre ish-presidentë amerikanë u bashkuan me aktivitetet dhe grupet e tjera për të mbështetur formimin e "Welcome.US", organizata që mbështet refugjatët afganë që vijnë në Amerikë, transmeton Anadolu Agency (AA).

George W. Bush, Bill Clinton dhe Barack Obama, së bashku me gratë e tyre, me grupet e mbështetësve janë anëtarë të organizatës që do të ndihmojë mijëra afganë që u larguan nga vendi i tyre nga frika e hakmarrjes nga talebanët pasi ndihmuan forcat amerikane dhe aleate gjatë okupimit të tyre.

Presidenti amerikan, Joe Biden, evakuoi trupat amerikane që nga 30 gushti, duke i dhënë fund dislokimit të tyre gati 20-vjeçar në vend.

"Mijëra afganë qëndruan me ne në vijat e para për të punuar për një botë më të sigurt, dhe tani ata kanë nevojë për ndihmën tonë. Ne jemi krenarë që mbështesim 'Welcome.US' dhe punën për të ndihmuar familjet afgane të vendosen dhe të ndërtojnë jetë të reja”, thanë George W. Bush dhe gruaja e tij Laura në një deklaratë nga organizata.

"Ne jemi të gatshëm t'u tregojmë fqinjëve tanë të rinj afganë dhe pjesës tjetër të botës se si një shpirt mikpritës dhe bujar formon shtyllën kurrizore të asaj që e bën vendin tonë kaq të madh", tha ai.

Ishte Bush ai që si president nisi pushtimin amerikan të Afganistanit pas sulmeve terroriste të 11 shtatorit të vitit 2001 në Qendrën Botërore të Tregtisë në New York dhe Pentagon në Washington DC. Lufta vazhdoi gjatë presidencës së Obamës dhe të Donald Trump, duke arritur kulmin me vendimin e Biden për të tërhequr forcat amerikane në fund të muajit të kaluar. Kjo në mënyrë efektive nënkuptonte që të gjitha forcat aleate duhej të largoheshin.

"Welcome.US" mbështetet gjithashtu nga bizneset amerikane, përfshirë gjigantin e kafesë Starbucks dhe Microsoft, si dhe shoqatat joqeveritare dhe ato të veteranëve. Një numër udhëheqësish shtetërorë amerikanë thanë se do të ishin të lumtur të pranonin refugjatët afganë në komunitetet e tyre.

Rreth 73.500 "shtetas të vendeve të treta dhe civilë afganë" janë larguar nga Afganistani, tha gjenerali Kenneth F. McKenzie Jr., komandant i Komandës Qendrore të SHBA-së (CENTCOM), në një konferencë për media më 30 gusht.

Njoftimi i "Welcome.US" vjen teksa anëtarët e Kongresit ndjekin tërheqjen, kurse republikanët kritikojnë sekretarin amerikan të Shtetit, Antony Blinken, për kontrollin e sigurisë së refugjatëve.