Presidenti i SHBA-së, Donald Trump, ka zbuluar se ka pranuar një letër nga homologu i tij ukrainas, Volodymyr Zelenskyy, ku ka shprehur gatishmërinë e Kievit për të ardhur në tryezën e bisedimeve në ndjekje të "paqes së qëndrueshme", transmeton Anadolu.

Në fjalimin e tij të parë në Kongres që nga kthimi në detyrë, Trump tha se në letër thuhet se "Ukraina është e gatshme të vijë në tryezën e negociatave sa më parë për të sjellë paqen e qëndrueshme më afër".

"Askush nuk dëshiron paqe më shumë se ukrainasit", tha Trump.

Sipas tij, në letër Zelenskyy shkroi se ekipi i tij dhe ai janë të gatshëm "të punojnë nën udhëheqjen e fuqishme të presidentit Trump për të arritur paqe që zgjat".

"Ne vërtetë vlerësojmë sa shumë ka bërë Amerika për të ndihmuar Ukrainën të ruajë sovranitetin e saj", tha Zelenskyy në letër sipas presidentit amerikan.

Trump gjithashtu theksoi gatishmërinë e Ukrainës për të nënshkruar një marrëveshje për mineralet dhe sigurinë.

"Për sa i përket marrëveshjes për mineralet dhe sigurinë, Ukraina është e gatshme ta nënshkruajë atë në çdo kohë që është e përshtatshme për ju", citoi Trump të ketë thënë Zelenskyy në letër.

Presidenti amerikan gjithashtu theksoi se diskutimet e njëkohshme me Rusinë kanë treguar shenja të gatishmërisë për bisedime paqeje.

"Njëkohësisht, ne kemi pasur diskutime serioze me Rusinë dhe kemi marrë sinjale të forta se ata janë gati për paqe. A nuk do të ishte e bukur?", shtoi Trump.

Pala ukrainase nuk e konfirmoi menjëherë letrën.

Më herët, Zelenskyy shprehu keqardhjen për takimin e diskutueshëm të javës së kaluar në Shtëpinë e Bardhë, duke theksuar se "nuk shkoi siç ishte planifikuar".

Në platformën sociale X, Zelenskyy përsëriti gatishmërinë e Ukrainës për të filluar negociatat me Rusinë sa më parë për të zgjidhur konfliktin që filloi më 24 shkurt të vitit 2022.

"Takimi ynë në Washington, në Shtëpinë e Bardhë të premten, nuk shkoi ashtu siç duhej të ishte. Është për të ardhur keq që ndodhi në këtë mënyrë. Është koha për t'i rregulluar gjërat. Ne do të dëshironim që bashkëpunimi dhe komunikimi i ardhshëm të ishin konstruktiv", shtoi ai.