Palestinezët e liruar nga burgu "Ofer" i Izraelit mbërritën në qytetin Ramallah të Bregut Perëndimor të enjten herët, raporton Anadolu.

Autobusi që transportonte dhjetëra të burgosur palestinezë të liruar të shoqëruar nga ekipe të Kryqit të Kuq Ndërkombëtar mbërriti në Pallatin e Kulturës, ku po prisnin familjet e tyre.

Mbërritja e autobusit u prit me brohoritje të forta dhe thirrje gëzimi nga turma e mbledhur. Ndërsa të burgosurit filluan të dilnin nga autobusi, familjet e tyre i përshëndetën me përqafime emocionale. Disa nga të burgosurit e liruar kanë shfaqur shenja rraskapitjeje dhe janë dërguar në spital për ndihmë mjekësore.

Laila Ghannam, guvernatorja e Ramallahut dhe Al-Birehut, tha gjatë pritjes së të burgosurve se ushtria izraelite i ka liruar ata të veshur me parulla raciste dhe nxitëse, por shtoi se atyre iu dhanë rroba alternative.

Ajo shtoi se të burgosurit kanë raportuar se vuanin nga sëmundje të lëkurës dhe disa kanë kërkuar ekzaminime mjekësore. I burgosuri i liruar Saeed Diab, nga qyteti i Qalqilya-s, tha në një intervistë televizive se ai ishte dënuar me 27 vjet burg, nga të cilat ka mbajtur 18 vjet.

Duke përshkruar emocionet e tij, Diab tha: "Ndihem sikur të isha kthyer nga vdekja në jetë edhe një herë".

Zyra e Informacionit për të Burgosurit e grupit palestinez Hamas kishte njoftuar se 43 prej të burgosurve pritej të liroheshin në Bregun Perëndimor, përfshirë Kudsin e pushtuar, nga gjithsej 620 që do të lirohen.

Lirimi është pjesë e grupit të shtatë të vonuar të marrëveshjes së shkëmbimit të të burgosurve midis Hamasit dhe Izraelit. Në lidhje me këtë, agjencia zyrtare palestineze e lajmeve WAFA raportoi se autobusi që mbërriti në Pallatin Kulturor në Ramallah mbante 37 të burgosur.

Ndërkohë, një i burgosur palestinez nga Betlehemi u transferua nga një ambulancë e Gjysmëhënës së Kuqe Palestineze në një spital në Bregun Perëndimor pasi u dorëzua nga spitali "Hadassah Ein Kerem" në Luds, ku kishte qenë në gjendje kome.

Për më tepër, pesë të burgosur të liruar kanë mbërritur në Kudsin e pushtuar. Midis tyre, Ahed Natsha ka mbërritur në shtëpi me pranga, sipas Zyrës së Informacionit të të Burgosurve të Hamasit.

Marrëveshja e armëpushimit në Gaza, e cila filloi më 19 janar, përbëhet nga tri faza, secila me kohëzgjatje prej 42 ditësh, me negociata të nevojshme përpara se të kalohet në fazën tjetër.

Faza e parë përfshinte lirimin e 33 pengjeve izraelitë, të gjallë dhe të vdekur. Fraksionet palestineze e kanë përmbushur këtë angazhim duke liruar 25 të burgosur të gjallë dhe tetë trupa në tetë raunde. Grupi i fundit, i dorëzuar të mërkurën mbrëma/të enjten, përbëhej nga trupat e katër të burgosurve izraelitë.

Në këmbim, Izraeli ka liruar 1.135 të burgosur palestinezë për gjashtë raundet e para të shkëmbimit të të burgosurve, përfshirë dhjetëra me dënime të përjetshme.