Ukraina tha sot se të paktën një person është vrarë dhe 23 të tjerë janë plagosur në një sulm ajror rus në qytetin juglindor të vendit, Zaporizhzhia, transmeton Anadolu.

“Sipas të dhënave të përditësuara, 23 persona u plagosën, duke përfshirë katër fëmijë, si rezultat i sulmeve ajrore ruse ... në Zaporizhzhia”, thuhet në një deklaratë të Shërbimit Shtetëror të Emergjencave.

Shërbimi shtoi se disa ndërtesa nëntëkatëshe dhe një institucion arsimor janë shkatërruar pjesërisht dhe makina kanë marrë flakë.

Punonjësit e urgjencës kanë shuar zjarrin dhe kanë nisur operacionet e kërkim-shpëtimit.

Guvernatori i Zaporizhzhias, Ivan Fedorov, tha në një deklaratë të veçantë se të katër fëmijët e lënduar po trajtohen në spital dhe janë në gjendje të moderuar.

Autoritetet ruse nuk e kanë komentuar menjëherë sulmin.

Zaporizhzhia është 40 kilometra nga vija e frontit me Moskën dhe është goditur shpesh nga sulmet ajrore gjatë luftës trevjeçare në Ukrainë.