Komisioneri i Përgjithshëm i Agjencisë së OKB-së për Refugjatët Palestinezë në Lindjen e Afërt (UNRWA), Philippe Lazzarini tha se "uria dhe dëshpërimi po përhapen" për shkak të përdorimit të ushqimit dhe ndihmës nga Izraeli si armë në Gaza, transmeton Anadolu.

Në një deklaratë nga llogaria e tij në X Lazzarini potencoi situatën e fundit në Rripin e Gazës ku Izraeli vazhdon sulmet e dhunshme.

"Uria dhe dëshpërimi po përhapen për shkak të përdorimit të ushqimit dhe ndihmës si armë", tha Lazzarini duke shtuar se: "Ndaj Gazës po zbatohet bllokadë e plotë prej më shumë se një muaji. Autoritetet izraelite vazhdojnë të ndalojnë hyrjen e nevojave bazë si ushqimi, ilaçet dhe karburantet. Ky është ndëshkim kolektiv".

Ai thekson se njerëzit po vuajnë nga uria dhe se në Gaza po shihet kaos dhe plaçkitje. Lazzarini shtoi se rendi civil ka filluar të përkeqësohet për shkak të bllokadës së rreptë të vendosur nga Izraeli.

Lazzarini tërhoqi vëmendjen se njerëzit në Gaza janë jashtëzakonisht të lodhur sepse janë të bllokuar në një zonë të vogël. "Duhet të lejohet hyrja e ndihmave dhe të hiqet bllokada", tha ai.

- Kriza humanitare në Gaza thellohet çdo ditë e më shumë

Izraeli vendosi të ndalojë hyrjen e ndihmave humanitare në Rripin e Gazës që nga 2 marsi, pas përfundimit të fazës së parë 42-ditore të marrëveshjes së armëpushimit dhe shkëmbimit të pengjeve me Hamasin.

Në sulmet e kryera nga ushtria izraelite që nga 7 tetori 2023, rreth 2 milionë njerëz janë zhvendosur në Rripin e Gazës, i cili ka një popullsi prej 2.3 milionë banorësh. Izraeli i cili ka shënjestruar gjithashtu infrastrukturën civile dhe spitalet, ka shkaktuar një fatkeqësi humanitare në Gaza.

Ndërprerja e furnizimit me ujë dhe energji elektrike në rajon dhe mbajtja e pikave kufitare të mbyllura thellon më tej kushtet e vështira që përjetojnë palestinezët në Gaza. Mëngjesin e 18 marsit ushtria izraelite rifilloi sulmet e dhunshme pasi prishi armëpushimin në Rripin e Gazës, i cili hyri në fuqi më 19 janar.

Që kur ushtria izraelite rifilloi sulmet, 1.163 palestinezë kryesisht të moshuar, gra dhe fëmijë, humbën jetën dhe 2.735 të tjerë u plagosën. Numri i palestinezëve të vrarë në sulmet e Izraelit në Rripin e Gazës që nga 7 tetori 2023 është rritur në 50.523 ndërsa numri i të plagosurve në 114.776.