Në një takim ministror të gjashtë vendeve arabe në Kajro sot, u hodh poshtë me vendosmëri zhvendosja e palestinezëve nga Gaza dhe u përsërit thirrja për zbatimin e një zgjidhjeje me dy shtete për konfliktin izraelito-palestinez, transmeton Anadolu.

Pas takimit, i mbajtur me ftesë të Egjiptit dhe ku morën pjesë përfaqësues nga Arabia Saudite, Emiratet e Bashkuara Arabe (EBA), Katari, Jordania, Palestina dhe Liga Arabe, u lëshua një deklaratë e përbashkët, në të cilën është theksuar rëndësia e punës për një paqe të drejtë dhe të qëndrueshme në Lindjen e Mesme.

Në deklaratë është shprehur gjithashtu mbështetje për bashkëpunimin me administratën e presidentit amerikan Donald Trump në përpjekjet për të arritur një paqe gjithëpërfshirëse në rajon, bazuar në zgjidhjen me dy shtete.

Vendet pjesëmarrëse shprehën kundërshtimin e tyre të fortë ndaj çdo përpjekjeje për të cenuar të drejtat e patjetërsueshme të palestinezëve. Kjo përfshin aktivitetet e vendbanimeve kolone, dëbimet me forcë, prishjet e shtëpive, aneksimet e tokave ose çdo masë që inkurajon zhvendosjen ose çrrënjosjen e palestinezëve nga toka e tyre.

Gjashtë vendet i bënë thirrje komunitetit ndërkombëtar, veçanërisht fuqive globale dhe Këshillit të Sigurimit të OKB-së, të ndërmarrin veprime të menjëhershme drejt zbatimit të zgjidhjes me dy shtete.

Ky takim vjen pas deklaratave të përsëritura nga Trumpit që sugjeronte “pastrimin” e Gazës dhe zhvendosjen e palestinezëve në Egjipt dhe Jordani, duke e përshkruar enklavën si “vend shkatërrimi”.

Të dy vendet, megjithatë, kundërshtuan me forcë çdo thirrje për zhvendosjen e palestinezëve nga toka e tyre.

Propozimi i Trumpit erdhi pasi një marrëveshje armëpushimi hyri në fuqi në Gaza më 19 janar, duke pezulluar luftën izraelite, që ka vrarë më shumë se 47.400 palestinezë, shumica prej tyre gra dhe fëmijë, që nga një sulm ndërkufitar nga Hamasi më 7 tetor 2023. Sulmet brutale izraelite e kanë kthyer enklavën në një shkretëtirë rrënojash.

Propozimi i Trump ka tërhequr dënime të gjera, me kritikët që e kanë quajtër atë “spastrim etnik” dhe “krim lufte”. Shumë vende në botën myslimane dhe arabe, si dhe vende evropiane si Franca, e kanë hedhur poshtë me vendosmëri këtë ide.