Presidenti ukrainas, Volodymyr Zelenskyy, ka bërë të ditur se ai ka folur me kryeministrin e Mbretërisë së Bashkuar, Keir Starmer, për të koordinuar hapat e përbashkëta diplomatike që synojnë arritjen e paqes dhe garantimin e sigurisë, transmeton Anadolu.

Në platformën sociale X, Zelenskyy bisedën me kryeministrin britanik e quajti “kuptimplote dhe të sinqertë”.

“Diskutuam zhvillimet e fundit, koordinimin e hapave tona të ardhshme dhe forcimin e mëtejshëm të bashkëpunimit tonë për të arritur një paqe dinjitoze”, shkroi Zelenskyy.

Ai tha se në bisedë ata diskutuan vizitën e parlamentarëve evropianë në Ukrainë dhe shprehu “falënderime të veçanta” për pjesëmarrjen e kreut të Dhomës së Përfaqësuesve të Mbretërisë së Bashkuar, Lindsay Hoyle.

Presidenti ukrainas tha se Starmer ndau detaje të bisedës së tij me presidentin amerikan, Donald Trump, duke përfshirë diskutimet mbi rezultatin e samitit të fundit të Parisit dhe nevojën për të mbajtur presionin mbi presidentin rus, Vladimir Putin.

“Ne koordinuam hapat tona të ardhshme dhe diskutuam përgatitjet për takimin e ardhshëm në Ukrainë më vonë këtë javë të përfaqësuesve nga shtabet e përgjithshme të vendeve të gatshme për të siguruar kontingjentet e tyre. Ne po përgatitemi për diskutime thelbësore”, tha Zelenskyy.

Javën e kaluar, Starmer u takua me liderët botëror në Paris për takimin e tretë të të ashtuquajturit “koalicioni i vullnetarëve”, një grup i udhëhequr nga ai dhe presidenti francez, Emmanuel Macron për të rritur mbështetjen për Ukrainën.