Ukraina vlerëson “shumë” marrëdhëniet e saj me Türkiyen dhe qëndrimin për “sovranitetin dhe integritetin territorial” të vendit, tha presidenti Volodymyr Zelenskyy, i cili takoi presidentin turk Recep Tayyip Erdoğan sot në Ankara, transmeton Anadolu.

“Ukraina i vlerëson shumë marrëdhëniet e saj me Türkiyen, mirëkuptimin e ndërsjellë që ndajmë dhe mbështetjen që marrim në këtë kohë të jashtëzakonshme lufte. Ne jemi mirënjohës për mirëpritjen e ngrohtë dhe qasjen absolutisht konstruktive në negociatat tona”, ka shkruar në X Zelenskyy, i cili gjithashtu foli në një konferencë të përbashkët shtypi me Erdoğanin.

Ai tha se Erdoğanin ka diskutuar “proceset globale” që mund të kontribuojnë në përfundimin e luftës së Rusisë në Ukrainë, duke përfshirë rëndësinë e përpjekjeve të përbashkëta për të siguruar garancitë e sigurisë për Kievin.

“Ne folëm gjithashtu për marrëdhëniet tona dypalëshe, çështjet ekonomike, bashkëpunimin mes shoqërive tona në arsim, projekte të ndryshme, sigurinë ushqimore dhe punën për kthimin e të burgosurve tanë të mbajtur nga Rusia”, tha presidenti ukrainas.

“Ne i jemi mirënjohës Türkiyes për gjithë mbështetjen ndaj vendit dhe popullit tonë, për qëndrimin e saj parimor ndaj sovranitetit dhe integritetit territorial të shtetit tonë”, tha Zelenskyy.

Ukraina dhe Türkiye nënshkruan dy marrëveshje dypalëshe për bashkëpunimin në arsim dhe media.

Vizita e Zelenskyyt erdhi pas përvjetorit të tretë të luftës në Ukrainë, të cilën presidenti amerikan Donald Trump është zotuar se do të përfundojë me shpejtësi.

Delegacionet ruse dhe amerikane u takuan në kryeqytetin saudit Riad sot për bisedimet e para të nivelit të lartë që nga fillimi i luftës në shkurt 2022. Ata ranë dakord për më shumë bisedime për përfundimin e luftës dhe për të përmirësuar lidhjet dypalëshe.

Erdoğan sot tha se Türkiye do të ishte një mikpritëse ideale për takimet e mundshme të ardhshme midis Rusisë, Ukrainës dhe SHBA-së.