Valët e të nxehtit në Skandinavi dhe reshjet vdekjeprurëse të Evropës Perëndimore, tymi siberian dhe nxehtësia rekorde në Amerikën e Veriut që shkakton zjarre shkatërruese janë midis katastrofave që përfshijnë "ndryshimet klimatike të shkaktuara nga njeriu", tha të premten zyra globale e motit, transmeton Anadolu Agency (AA).
Në një konferencë dyjavore për shtyp të OKB-së në Gjenevë, zëdhënësja e Organizatës Botërore Meteorologjike (OBM) Clare Nullis theksoi se tragjedia evropiane është për shkak të reshjeve të mëdha të shiut që shkaktuan përmbytje shkatërruese në Evropën Perëndimore, duke lënë të paktën 100 të vdekur këtë javë.
"Gjermania dhe Belgjika kanë qenë më të prekurat për sa i përket humbjes së jetës, por nuk është vetëm përmbytja", tha Nullis.
"Në të njëjtën kohë, pjesë të Skandinavisë po përballen me një valë të nxehtit. Tymi nga Siberia ka ndikuar në cilësinë e ajrit përgjatë linjës ndërkombëtare të të dhënave në Alaskë. Kjo tregon se sa larg ka shkuar tymi", shtoi ajo.
Ajo tha se nxehtësia e paparë në pjesën perëndimore të Amerikës Veriore ka shkaktuar zjarre shkatërruese dhe tymi po shtrihet në distanca të mëdha.
"Përsëri, po përjetojmë një verë me nxehtësi të paparë, thatësira, vende të ftohta dhe të lagështa", tha Nullis.
Reshjet e dy muajve bien në dy ditë
Disa pjesë të Evropës Perëndimore, veçanërisht Gjermani, Belgjikë dhe Holandë, regjistruan sasi të reshjeve të shiut të cilat bien për dy muaj në vetëm dy ditë më 14 dhe 15 korrik, duke përkeqësuar tokën e ngopur nga shiu i mëparshëm.
"Dhe kjo po ndodh në vendet shumë të zhvilluara me sisteme shumë të mira paralajmëruese të hershme dhe menaxhim të katastrofave. Kjo tregon shkallën e kësaj katastrofe pasi kemi parë imazhe të shtëpive që shemben. Vërtet është shkatërruese", tha ajo.
Nuk është vetëm Gjermania që është shkatërruar, ku shërbimi i motit i vendit e përshkroi atë si një "katastrofë", por po ashtu janë goditur edhe Belgjika, Luksemburgu, Holanda, Zvicra dhe Franca Verilindore.
Ndërsa Evropa Qendrore pësoi përmbytje vdekjeprurëse, Evropa Veriore është përfshirë nga një valë e të nxehtit.
Sipas zyrës së saj të motit, Finlanda kishte qershorin e saj më të ngrohtë të regjistruar, kurse moti i nxehtë vazhdoi edhe në korrik.
Kouvola Anjala, në Finlandën jugore, ka regjistruar 27 ditë rresht temperatura mbi 25°C, vala më e zgjatur e nxehtësisë në vend.
"Kjo është Finlanda, nuk është Spanja, nuk është Afrika e Veriut", tha Nullis.
Sipas shërbimit meteorologjik finlandez, Gjiri i Finlandës në Detin Baltik regjistroi ngrohtësi rekord, deri në 26.6°C më 14 korrik, temperatura më e lartë që kur filluan matjet 20 vjet më parë.
SHBA-ja perëndimore dhe Kanadaja gjithashtu janë kapluar nga nxehtësia, me rekorde të thyera në valën më të fundit të nxehtësisë fundjavën e kaluar në jugperëndim të SHBA-së .
Las Vegasi në Nevada theu rekordin e tij prej 47.2°C, ashtu si edhe shteti Utah.
Sipas Shërbimit Kombëtar të Motit të SHBA-së, në Las Vegas, Death Valley, California, raportoi temperatura prej 54.4°C më 9 korrik.
OBM tha se është gati të verifikojë temperaturat e reja ekstreme.
"Tani jemi duke vlerësuar leximin e 130°F në gusht 2020 në Death Valley i cili mban rekordin më të lartë të temperaturës në botë", tha Nullis.
Ajo tha se të gjithë pyesin: "Çfarë u bë me ndryshimet klimatike?"
Nullis tha se ajo që u vërejt në pjesë të SHBA-së dhe Kanada në fund të qershorit ka çuar në hulumtime të shpejta të atribuimit të kryera nga një grup i shquar i studiuesve të klimës, kurse rezultatet u publikuan javën e kaluar.
"Ata thanë se kjo valë e nxehtësisë do të ishte praktikisht e pamundur pa ndikimin e ndryshimeve klimatike të shkaktuar nga njeriu", tha zëdhënësja e OBM-së.
"Ndryshimet klimatike të shkaktuara nga emetimet e gazeve serë e bënë valën e nxehtësisë të paktën 150 herë më të mundshme", tha ajo.
