“Turqia duhet të rrisë eksportet e saj në Indonezi”

Turqia duhet të rrisë eksportet e saj në Indonezi, që aktualisht arrijnë në më pak se 300 milionë dollarë në vit, me deficitin tregtar dypalësh rreth 1 miliard dollarë, tha ministrja turke e Tregtisë, Ruhsar Pekcan, raporton Anadolu Agency (AA).

"Nuk duhet ta postojmë këtë deficit. Ne duhet ta ndryshojmë këtë situatë. Mund të rrisim tregtinë tonë shumë më tepër dhe të rregullojmë bilancin tregtar", theksoi Pekcan gjatë një ceremonie online të hapjes së Delegacionit Virtual të Tregtisë Turqi-Indonezi të organizuar nga Asambleja Turke e Eksportuesve (TIM).

Indonezia është vendi i katërt më i populluar në botë me mbi 273 milionë banorë. Pavarësisht distancës gjeografike, Turqia mund të eksportojë shumë më tepër në Indonezi, nënvizoi ajo.

"Ne i besojmë prodhimit tonë, potencialit të eksportit dhe kapacitetit konkurrues", shtoi Pekcan.

Pekcan po ashtu tha se të dy vendet po vazhdojnë diskutimet praktikisht për të krijuar një zonë të tregtisë së lirë midis Turqisë dhe Indonezisë.

Duke prekur pandeminë e koronavirusit, ajo tha se vazhdon të ndikojë në ekonominë globale dhe Turqia fatkeqësisht po regjistron një valë të dytë si disa vende evropiane.

"Nga njëra anë, jeta duhet të vazhdojë për mirëqenien e të gjithë neve. Për përmirësimin dhe zhvillimin e vendit tonë, prodhimi dhe eksportet duhet të vazhdojnë", shtoi ajo.

Në këtë proces, qeveria mbështet eksportuesit me organizime online të delegacionit të tregtisë, tha ajo.

Që nga maji i vitit të kaluar, u organizuan disa ngjarje online dhe 600 kompani turke u mblodhën me 1.600 firma të huaja, vuri në dukje Pekcan.

Ismail Gülle, kreu i TIM, tha se vëllimi tregtar midis Turqisë dhe Indonezisë në vitin 2001 arriti në 235 milionë dollarë.

"Kjo shifër ishte 1,5 miliard dollarë më 2019. Turqia eksportoi mallra me vlerë 277 milionë dollarë në Indonezi, ndërsa importet ishin 1,22 miliard dollarë", tha ai.

"Synimi ynë për vitin 2023 është të rrisim këtë vëllim në 10 miliard dollarë", shtoi Gülle.

Ai theksoi se eksportet e Turqisë në Indonezi në dhjetë muajt e parë të vitit 2020 arritën në 183 milionë dollarë.

Mahmut Erol Kılıç, ambasadori i Turqisë në Indonezi, tha se Kina ishte partneri kryesor i Indonezisë në tregtinë e jashtme.

Ai tha se Indonezia ka një numër standardesh të larta për mallrat e importuara, duke zbatuar politika proteksioniste.