Bashkimi Evropian (BE) dënoi "fuqishëm" vrasjen e 12 punonjësve shëndetësorë në një sulm izraelit pranë rrethit Baalbek në Libanin lindor, transmeton Anadolu.

"Sulmet ndaj punonjësve të kujdesit shëndetësor dhe objekteve shëndetësore janë shkelje e rëndë e ligjit ndërkombëtar humanitar. Mbrojtja e personelit mjekësor në zonat e konfliktit është e panegociueshme", tha në X Josep Borrell, shefi i politikës së jashtme të bllokut.

"Qoftë mospërfillje e pamatur apo shënjestrim i qëllimshëm, ky është një sulm i hapur ndaj dinjitetit njerëzor, duke rrezikuar jetët dhe duke shkelur në mënyrë flagrante të drejtat themelore të njeriut", shtoi ai.

Një sulm ajror izraelit synoi qytetin Douris të enjten vonë, duke shkaktuar shembjen e qendrës së mbrojtjes civile dhe shkatërrimin e një ndërtese ngjitur, sipas Agjencisë Kombëtare të Lajmeve të Libanit.

Izraeli këtë shtator nisi një fushatë ajrore në Liban kundër atyre që pretendon se janë objektiva të grupit Hezbollah, në një përshkallëzim pas një viti të luftës ndërkufitare që nga fillimi i sulmeve izraelite në Gaza në tetor 2023.

Gati 3.400 njerëz janë vrarë, mbi 14.400 të plagosur dhe më shumë se 1 milion njerëz janë zhvendosur nga sulmet izraelite që nga tetori i kaluar, sipas autoriteteve shëndetësore libaneze.

Izraeli më 1 tetor filloi një inkursion tokësor në Libanin jugor.