Erdoğan: Bashkëpunimi ekonomik mes Türkiye-s dhe Kroacisë, 'premtues'

Türkiye dhe Kroacia janë vende partnere dhe vrulli në bashkëpunimin dypalësh është “premtues”, tha sot presidenti turk Recep Tayyip Erdoğan, raporton Anadolu Agency (AA).

“Türkiye dhe Kroacia janë vende partnere për sa i përket vendndodhjeve dhe ekonomive të tyre rajonale. Vrulli që kemi arritur në bashkëpunimin ekonomik dhe tregtar në vitet e fundit është premtues”, tha Erdoğan në Forumin e Biznesit Türkiye-Kroaci në kryeqytetin Zagreb, stacioni i fundit i turneut të tij ballkanik në tre vende, pas Bosnjë e Hercegovinës dhe Serbisë.

Erdoğan tha se vëllimi i tregtisë dypalëshe tejkaloi 760 milionë dollarë në tetë muajt e parë të vitit 2022, duke shtuar: “Objektivi ynë i ri është 2 miliardë dollarë në afat të shkurtër”.

“Kompanitë tona kryejnë punë strategjike në sektorë të ndryshëm, veçanërisht në energji, ndërtim, infrastrukturë, turizëm dhe banka”, theksoi ai.

Presidenti turk u bëri thirrje biznesmenëve të bëjnë përpjekje për të forcuar marrëdhëniet ekonomike dypalëshe.

“Unë besoj se bashkëpunimi gjithëpërfshirës ekonomik dhe tregtar midis Türkiye-s dhe Kroacisë do të kontribuojë në zhvillimin e rajonit si dhe të vendeve tona”, shtoi ai.

Duke lavdëruar dronët luftarakë turq, Erdoğan tha: “Falë hapit që bëmë duke lexuar të ardhmen në teknologjitë e mjeteve ajrore pa pilot, ne jemi sot një nga tre vendet më të suksesshme në botë në këtë fushë”.