Kina, Japonia, Koreja e Jugut dhe zyrtarë të Azisë Juglindore diskutojnë mbi tarifat e SHBA-së
Banka Qendrore e Kinës do të zbatojë politikë lehtësuese monetare dhe do të mbështesë performancën e qëndrueshme të tregut financiar për të mbështetur momentin e rimëkëmbjes ekonomike
Istanbul
Zyrtarë të financave dhe të bankës qendrore nga Kina, Japonia, Koreja e Jugut dhe vende të tjera të rajonit të Azisë Juglindore janë takuar këtë javë dhe kanë diskutuar mbi ndikimin e tarifave të SHBA-së në situatën makroekonomike globale dhe rajonale, transmeton Anadolu.
Banka Qendrore e Kinës njoftoi se zv/guvernatori i Bankës Popullore të Kinës, Xuan Changneng, mori pjesë në takimin e rregullt të Shoqatës së Kombeve të Azisë Juglindore (ASEAN) dhe nënkryetarët e financave dhe bankave qendrore të Kinës.
"Në takim u diskutua mbi ndikimin e tarifave të SHBA-së në perspektivën ekonomike globale dhe rajonale, si dhe zgjerimin e Iniciativës Chiang Mai për Multilateralizimin (CMIM) dhe Zyrën e Kërkimeve Makroekonomike ASEAN+3 (AMRO), duke arritur konsensus të gjerë për thellimin e koordinimit të politikave rajonale dhe forcimin e rrjetit rajonal të sigurisë financiare", thuhet në njoftim.
Më tej, thuhet se në margjinat e këtij takimi, Kina, Japonia dhe Koreja mbajtën "takimin trepalësh të Financave dhe Deputetëve të Bankës Qendrore për të shkëmbyer pikëpamjet mbi perspektivën ekonomike dhe bashkëpunimin financiar rajonal".
Sipas njoftimit, Banka Qendrore e Kinës do të zbatojë politikë monetare lehtësuese dhe do të mbështesë performancën e qëndrueshme të tregut financiar për të mbështetur momentin e rimëkëmbjes ekonomike.
Javën e kaluar, presidenti amerikan, Donald Trump njoftoi tarifa të reja më të larta në mbarë botën, duke shkaktuar pasiguri në tregjet globale. Presidenti amerikan vendosi tarifa më të larta ndaj mbi 180 vendeve, duke filluar nga 10 për qind deri në 50 për qind, por më vonë ai pezulloi "tarifat reciproke" për 90 ditë për të gjitha vendet, përveç Kinës. Ai tha se do të rrisë tarifën ndaj Kinës në 125 për qind.
Dje, Kina tha se SHBA-ja po ushtron "presion maksimal" dhe po përdor tarifat si "armë", si dhe u zotua se nuk do t'i dorëzohet kësaj. Më vonë, një zyrtar i Shtëpisë së Bardhë konfirmoi se tarifat e SHBA-së për importet kineze tani arrijnë në 145 për qind, pasi Trump rriti detyrimet e importit këtë javë.
