OPEC+ do të rrisë ngadalë prodhimin pas prillit

Organizata e Vendeve Eksportuese të Naftës (OPEC) dhe aleatët e saj, të njohur si OPEC+, do të rrisin gradualisht prodhimin e naftës midis majit dhe korrikut, u citua zëvendëskryeministri rus Aleksandër Novak nga agjencia e lajmeve Interfax, transmeton Anadolu Agency (AA).

Ish-ministri i energjisë i referohet marrëveshjes së fundit të ministrave të OPEC+ sipas së cilës vendet kryesore prodhuese të naftës do të rrisin prodhimin e tyre pas prillit. Prodhimi i grupit do të rritet me 2,1 milionë fuçi në ditë deri në fund të korrikut, duke lehtësuar frenimin aktual të prodhimit prej 7,9 milionë fuçi në ditë.

Novak gjithashtu tha se Ministria e Energjisë e Rusisë është e gatshme të mbështesë kufijtë e eksportit në produktet e naftës në mënyrë që të forcojë tregun e brendshëm.

Rusia dhe Bjellorusia do të integrojnë industritë e naftës

Ministri rus tha gjithashtu se vendi i tij ka hartuar një udhërrëfyes për mënyrën e integrimit të industrive të tyre të naftës.

"Ne tashmë kemi nënshkruar një udhërrëfyes për energjinë elektrike, ndërsa udhërrëfyesi për naftën dhe produktet e naftës është duke pritur për nënshkrim", deklaroi Novak gjatë një konference shtypi në Minsk.

Një strategji e ngjashme e detajuar për bashkëpunimin ruso-bjellorus në industrinë e gazit është duke u finalizuar, tha Novak.

Në vitin 2019, Rusia dhe Bjellorusia ranë dakord të zhvillojnë afërsisht 30 "harta" për të lehtësuar integrimin në sfera të shumëfishta. Nënshkrimi i marrëveshjes shënoi 20-vjetorin e dy fqinjëve që formuan një Union Shtetesh.