"OPEC+ të zvogëlojë hendekun midis prodhimit aktual dhe objektivave"

Organizata e Vendeve Eksportuese të Naftës (OPEC) dhe aleatët e saj, të quajtur OPEC+, duhet të punojnë për të zvogëluar hendekun midis objektivit të tyre të prodhimit dhe prodhimit aktual, tha sot kreu i Agjencisë Ndërkombëtare të Energjisë (IEA), Fatih Birol, raporton Anadolu Agency (AA).

Gjatë paraqitjes së tij në një konferencë për media në kryeqytetin saudit, Rijad, Birol pranoi se bota do të ketë ende nevojë për naftë dhe gaz për disa vitet e ardhshme, pavarësisht prirjes globale për diversifikim nga lëndët djegëse fosile.

Tregjet e naftës po vuajnë nga një hendek i ngushtë i ofertës dhe kërkesës, pasi prodhuesit më të mëdhenj të naftës në botë të grupit OPEC+ po përjetojnë vështirësi në përmbushjen e kuotave të tyre mujore të prodhimit.

Ai tha se "diferenca është aktualisht e madhe midis objektivave të vendosura nga vendet e OPEC+ për sa i përket niveleve të tyre të prodhimit dhe asaj që prodhohet sot".

Birol shpreson se rritja e prodhimit të naftës në Amerikë dhe Brazil do të lehtësonte presionin aktual mbi çmimet e naftës në një treg kaq të tendosur.

Aleanca OPEC+ mund të nxjerrë vetëm 280 mijë fuçi në ditë krahasuar me rritjen e planifikuar prej 400 mijë fuçi në ditë në janar, sipas IEA-së.

Humbja e grupit ka arritur në rreth 800 mijë fuçi në ditë që nga fillimi i vitit 2021. Sipas IEA-së, “nivelet më të ulëta ekzistuese të prodhimit kundrejt rritjeve të deklaruara mujore nga blloku kanë çuar në pasoja të padëshirueshme, me tërheqje të mprehta në inventarët globalë dhe mungesa të ofertës që kanë përkeqësuar ndërlikimin e tregut të naftës”.

IEA tha se deri në fund të këtij viti sasia e naftës e humbur mund të afrohet 1 miliard fuçi nëse anëtarët me kapacitet të konsiderueshëm rezervë, të përqendruar në Lindjen e Mesme, nuk pompojnë më shumë për të kompensuar ato vende që nuk mund ta bëjnë këtë.