Kosovë, shkon në 61 numri i të prekurve me COVID-19

Instituti Kombëtar i Shëndetit Publik në Kosovë (IKSHPK) ka bërë të ditur se janë diagnostikuar edhe 26 raste të reja me koronavirus të ri (Covid-19), duke çuar në 61 raste numrin total të të infektuarve, transmeton Anadolu Agency (AA).

Siç njofton IKSHPK, në Laboratorin e Mikrobiologjisë Molekulare në IKSHPK me metodën RT-PCR, janë testuar 100 mostra të marra në hulumtim të personave që kanë qenë në kontakt të afërt me rastet e konfirmuara dhe të gjithë kanë qenë në vetë izolim, përveç një rasti nga fshati Panorc, Malishevë.

"Nga këto mostra të marra për testim në virusin SARS-CoV, njëzet e gjashtë (26) prej tyre kanë rezultuar pozitive", thuhet në njoftim.

"Nga 26 rastet e konfirmuara të gjitha janë kontakte të gjurmuara të rasteve pozitive (familjarë dhe kontakte të ngushta), të detektuara përmes hulumtimit aktiv epidemiologjik. Prej tyre 14 raste janë nga komuna e Malishevës, 11 raste nga Gjilani dhe 1 rast nga Gjakova", bën të ditur IKSHPK.

Kosova, dje kishte njoftuar për vdekjen e parë nga Covid-19.