Kina mohoi sot një raportim të një mediaje gjermane që pretendonte diskutime për rolin e saj të mundshëm në forcat paqeruajtëse në Ukrainë, transmeton Anadolu.

“Raportimi nuk është aspak i vërtetë. Qëndrimi i Kinës për krizën në Ukrainë është i qëndrueshëm dhe i qartë”, u tha gazetarëve në Pekin zëdhënësi i Ministrisë së Jashtme Guo Jiakun, sipas një transkripti të konferencës së tij për shtyp.

Guo po i referohej një raporti të gazetës gjermane “Welt am Sonntag” që pretendonte se diplomatët kinezë kanë diskutuar mundësinë e pjesëmarrjes së Kinës në një kontingjent të mundshëm paqeruajtës në Ukrainë gjatë bisedimeve në Bruksel.

Ai gjithashtu vuri në dukje se “Grupi i Miqve për Paqe” për krizën e Ukrainës së fundmi ka mbajtur një takim në New York.

“Ata diskutuan zhvillimet e fundit të krizës në Ukrainë dhe perspektivat për arritjen e paqes së qëndrueshme”, tha ai, duke shtuar se takimi ishte “shumë i suksesshëm” dhe ripohoi zgjidhjen e konfliktit përmes “një zgjidhjeje politike të negociuar dhe mjeteve diplomatike”.

“Anëtarët e Grupit theksuan se konflikti mund të jetë duke i afruar një pike kthese dhe mirëpritën dinamikat e fundit drejt bisedimeve të paqes. Ata u kërkuan të gjitha palëve të interesuara të luajnë një rol konstruktiv, të gjejnë një zgjidhje të drejtë dhe të qëndrueshme – një zgjidhje që adreson shqetësimet e palëve në konflikt dhe çon në një marrëveshje paqeje të pranueshme për ta”, tha zëdhënësi i ministrisë.

Përpara inaugurimit të presidentit amerikan Donald Trump në janar të këtij viti, Kina dhe Brazili krijuan grupin për krizën ukrainase për të mbledhur konsensusin e Jugut Global dhe për të krijuar kushte për bisedimet e paqes.

Takimi në New York erdhi ndërsa SHBA-ja dhe Rusia po zhvillojnë negociata për të normalizuar marrëdhëniet si dhe për të arritur një armëpushim në Ukrainë.