Mes raporteve se Ukraina lëshoi raketa britanike në territorin rus, kryeministri britanik, Keir Starmer, në Dhomën e Komunëve ka deklaruar se mbështetja e Mbretërisë së Bashkuar ndaj Ukrainës është vetëm për vetëmbrojtje, transmeton Anadolu.

"Ne kemi thënë vazhdimisht se do të bëjmë atë që është e nevojshme për të mbështetur Ukrainën dhe në dimër për ta vendosur atë në pozicionin më të mirë të mundshëm. Mbështetja e Mbretërisë së Bashkuar për Ukrainën është gjithmonë për vetëmbrojtje", tha ai.

"Është proporcionale, e koordinuar dhe e shkathët dhe një përgjigje ndaj veprimeve të vetë Rusisë dhe është në përputhje me të drejtën ndërkombëtare në bazë të nenit 51 të Kartës së OKB-së. Ukraina ka një të drejtë të qartë të vetëmbrojtjes kundër sulmeve të paligjshme të Rusisë", shtoi ai.

Komentet e kryeministrit britanik vijnë një ditë pasi raketat britanike ‘Storm Shadow’ u lëshuan në Rusi për herë të parë.

Starmer tha se është krenar për parlamentin që ka treguar mbështetje të unifikuar ndër-partiake për Ukrainën për mbi 1 mijë ditë të konfliktit.

"Pra, e them përsëri, Rusia mund të tërheq forcat e saj dhe t'i japë fund kësaj lufte nesër, por deri atëherë ne do të ngrihemi për atë që e dimë se është e drejtë, për sigurinë e Ukrainës dhe për sigurinë tonë dhe ne do ta mbështesim Ukrainën me atë që është e nevojshme për aq kohë sa është e nevojshme", tha Starmer.

Ai akuzoi presidentin rus, Vladimir Putin, se dëshiron "shkatërrim dhe jo paqe", duke sfiduar kërcënimet nga Kremlini.

Dje, Rusia konfirmoi se Ukraina vu në shënjestër territorin e saj me raketa ‘Storm Shadow’ të prodhuara nga Mbretëria e Bashkuar, duke njoftuar se dy raketa u kapën nga mbrojtja ajrore gjatë ditës së kaluar.

"Dy raketa lundrimi ‘Storm Shadow’, gjashtë raketa ‘HIMARS’ dhe 67 mjete ajrore pa pilot u neutralizuan nga sistemet e mbrojtjes ajrore", tha në një deklaratë Ministria e Mbrojtjes e Rusisë, disa ditë pas lajmit se Washingtoni i dha Ukrainës dritë jeshile për përdorimin e raketave amerikane me rreze të gjatë veprimi në territorin rus.