Can Erözden
18 Dhjetor 2021•Përditësim: 18 Dhjetor 2021
Bayern Munich fitoi 4:0 në shtëpi kundër Wolfsburgut në një ndeshje të Bundesligës gjermane të premten, ndërsa sulmuesi Thomas Muller shënoi në paraqitjen e tij të 400-të në ligë, transmeton Anadolu Agency (AA).
Një produkt i pastër i Bayern-it, Muller është pjesë e ekipit të parë të klubit që nga viti 2009.
Muller shënoi golin e parë në minutën e shtatë në Allianz Arena.
Goditja e Serge Gnabry u ndal nga portieri i Wolfsburgut, Koen Casteels, por Muller goditi nga një distancë e afërt pas një kthimi të topit nga Casteels.
Mbrojtësi i Bayern Munich-ut, Dayot Upamecano, dyfishoi diferencën në minutën e 57-të.
Muller pasoi duke gjetur Upamecano-n në zonën e penalltisë, ndërsa francezi 23-vjeçar shënoi me kokë golin e tij të parë për Bayern Munich-un.
Dy minuta më vonë, Bayern Munich thelloi rezultatin në 3:0, ndërsa ylli Leroy Sane shutoi me këmbën e majtë dhe e dërgoi topin në këndin e golit nga vija zonës së penalltisë së Wolfsburg-ut.
Në minutën e 87-të, ylli polak i Bayern Munich-ut, Robert Lewandowski shënoi për rezultatin përfundimtar 4:0.
Upamecano me një top të gjatë mbi mbrojtjen e Wolfsburg-ut gjeti Jamal Musiala-n, i cili më pas ia pasoi Lewandowsk-it, i cili vrapoi në zonë. Sulmuesi polak shënoi një vole akrobatike, që ishte goli i tij i 18-të në ligë këtë sezon.
Bayern Munich konsolidoi vendin e parë në ligën gjermane me 43 pikë në 17 ndeshje.
Kundërshtari i tyre më i afërt në renditje, Borussia Dortmund, i cili radhitet i dyti, ka grumbulluar 34 pikë në 16 xhiro.
Ndërkohë, Wolfsburg ka 20 pikë dhe renditet në vendin e 12-të.
- Lewandowski thyen rekordin për gola të shënuar në Bundesligë në 1 vit
Me golin në minutat e fundit kundër Wolfsburg-ut, Lewandowski theu rekordin e golave të shënuar në Bundesligë në një vit të vetëm kalendarik që më parë i përkiste Gerd Muller-it për 49 vjet.
Ish-sulmuesi i Bayern-it shënoi 42 gola në ligë në vitin 1972.
Por Lewandowski ka shënuar 43 gola në ligë gjatë vitit 2021, duke vendosur rekordin e ri.
