Ndeshjet e futbollit në Gjermani (Bundesligë), Francë (Ligue 1), Angli (Premier Ligë), Spanjë (LaLiga) dhe Itali (Serie A), të cilat janë ndër 5 ligat më të mëdha të futbollit në Evropë, vazhduan gjatë fundjavës, raporton Anadolu.

Në Spanjë tabelën e kryeson Barcelona, kurse në Angli Liverpooli, në Itali Interi, në Gjermani Bayern Munich si dhe në Francë Paris Saint-Germain (PSG).

- Barcelona vazhdon kryesimin e tabelës

Lideri i LaLiga-s, Barcelona, e arriti fitoren e 7-të radhazi kundër Atletico Madridit me golat e shënuara në minutat shtesë, 4-2.

Në pamundësi për të parandaluar golat e Julian Alvarez dhe Alexander Sörloth, skuadra katalonjase arriti të shpëtojë tre pikë me golat e Robert Lewandowski, Ferran Torres (2) dhe Lamine Yamal, pavarësisht se ishte duke humbur me rezultat prej 2-0 në 20 minutat e fundit të kohës normale.

Kampioni i fundit, Real Madridi fitoi ndeshjen kundër Villarrealit me rezultatin 2-1. Ndërkaq, Athletic Bilbao arriti fitoren e parë pas dy javësh në ndeshjen kundër Sevilla-s, të cilën e fitoi 1-0.

Barcelona, ​​e cila ka 60 pikë në fund të javës së 28-të të kampionatit, është në krye të tabelës me diferencë golash, përpara Real Madridit edhe pse ka një ndeshje më pak. Më pas vijnë, Atletico Madridi dhe Athletic Bilbao me 56 ​​dhe 52 pikë përkatësisht.

- PSG i afrohet titullit

Lideri i Ligue 1, PSG fitoi ndaj Olympique Marseille me 3-1 në atë që konsiderohet një ndeshje "klasike" në futbollin francez, me golat e Ousmane Dembele, Nuno Mendes dhe Pol Lirola (autogol).

Ndjekësi më i afërt i PSG-së, Monaco fitoi ndaj Angers me rezultat prej 2-0, kurse Nice barazoi 1-1 me Auxerre.

Olympique Lyon siguroi fitoren e tretë radhazi, duke mposhtur Le Havre 4-2.

Në Ligue 1, ku PSG e pamposhtur kryeson me 68 pikë në fund të javës së 26-të, Marseille ka 49 pikë, Monaco dhe Nice kanë nga 47 pikë dhe Lyon ka 45 pikë.

PSG-ja, e cila ka arritur fitoren e 7-të radhazi, ka shansin të shpallet kampion në varësi të rezultateve që ekipet tjera do të marrin në javën e 27-të.

Që PSG të fitojë kampionatin me 7 javë të mbetura, do t'i duhet të fitojë kundër Saint-Etienne, Olympique Marseille do të duhet të humbasë kundër Reims dhe ndeshja Monaco-Nice duhet të përfundojë me barazim.

Nëse parisianët fitojnë dy ndeshjet e ardhshme ndaj Saint-Etienne dhe Angers, do të kurorëzohen kampionë në javën e 28-të, pavarësisht rezultateve të kundërshtarëve.

- Liverpool kryeson tabelën me 12 pikë diferencë

Liverpooli, i cili u eliminua nga PSG në UEFA Ligën e Kampionëve dhe humbi 2-1 nga Newcastle United në finalen e Kupës së Ligës angleze, e kaloi javën pa luajtur asnjë ndeshje në Premier League.

Arsenali, ndjekësi më i afërt i Liverpoolit, mposhti 1-0 Chelsean në derbin e Londrës dhe fitoi pas 3 javësh.

Kampioni i fundit, Manchester City, humbi pikë për herë të tretë në katër javë, pasi barazoi 2-2 ndaj Brightonit.

Nottingham Forest, skuadra surprizë e sezonit, fitoi 4-2 ndaj Ipswich Town.

Në javën e 29-të të ligës, Liverpooli kryeson tabelën me 70 pikë, 12 pikë përpara Arsenalit. Këto dy skuadra ndiqen nga Nottingham Forest me 54 pikë, Chelsea me 49 pikë dhe Manchester City me 48 pikë.

- Interi e rriti diferencën e pikëve në 3

Lideri i Serie A-së, Interi mori një frymë të thellë në krye të tabelës duke fituar 2-0 kundër Atalantës.

Napoli, ndjekësi më i afërt i vendit të parë, pësoi një barazim zhgënjyes 0-0 kundër kundërshtarit që është në zonën e rënies Venezia. Napoli, i cili humbi pikë për herë të 6-të në 7 javët e fundit.

Roma, nën drejtimin e Claudio Ranierit, i cili prej 13 javësh nuk ka parë humbje në kampionat, mundi 1-0 Cagliarin, ndërkaq Juventus humbi 3-0 ndaj Fiorentinas.

Bologna mposhti Lazion 5-0, duke arritur fitoren e katërt radhazi dhe duke pretenduar ende për t'u kualifikuar në Ligën e Kampionëve.

Duke mbledhur 64 pikë në 29 javë në kampionat, Interi rriti diferencën me Napoli në 3 pikë. Atalanta gjendet prapa këtyre dy skuadrave me 58 pikë, Bologna me 53 pikë, Juventus me 52 pikë, Lazio me 51 pikë dhe Roma me 49 pikë.

- Bayern Munich dy herë radhazi humb pikë

Lideri i Bundesligës, Bayern Munich, barazoi 1-1 me Union Berlinin, duke e pësuar humbjen e pikëve për herë të dytë radhazi.

Kampioni i fundit Bayer Leverkuseni mbajti gjallë ëndrrën e kampionatit me një fitore 4-3 kundër Stuttgartit.

Bayern Munich ruajti epërsinë në javën e 26-të të ligës me 62 pikë, përpara Bayer Leverkusen (56), Mainz 05 (45) dhe Eintracht Frankfurt (45).