OKB do të angazhohet me Turqinë për rivendosjen e refugjatëve
Agjencia për refugjatë pranë OKB-së do të studiojë planin e Turqisë për refugjatët sirianë dhe do të angazhohet me Ankaranë
Agjencia e Kombeve të Bashkuara (OKB) për Refugjatë (UNHCR) do të angazhohet me Turqinë për planin e saj për të rivendosur deri në 2 milionë refugjatë sirianë përgjatë kufirit jugor, transmeton Anadolu Agency (AA).
Njoftimi i OKB-së erdhi pas bisedimeve pas dyerve të mbyllura që zgjatën një orë mes presidentit turk Recep Tayyip Erdoğan dhe Sekretarit të Përgjithshëm të OKB-së, Antonio Guterres, të mbajtura në rezidencën Vahdettin në Stamboll.
"Presidenti Erdoğan ia prezantoi Sekretarit të Përgjithshëm planin e Turqisë për zona të reja banimi për kthimin e refugjatëve sirianë", u tha përfaqësuesve të mediave në New York zëdhënësi i OKB-së, Farhan Haq.
"Sekretari i Përgjithshëm theksoi parimet bazike sa i përket kthimit vullnetar, të sigurt dhe me dinjitet të refugjatëve. Ai informoi presidentin se UNHCR menjëherë do të formojë një ekip për të studiuar propozimin dhe do të përfshihet në diskutime me autoritetet turke, në përputhje me mandatin e tij", tha Haq.
Ai gjithashtu tha se Guterres gjithashtu ka shprehur "vlerësimin e tij të lartë" për mbështetjen turke, duke përfshirë edhe drejtimin e Bankës Teknologjike të OKB-së, e cila mbështet punën zhvillimore në rajon dhe që lufton kërcënimin e ndryshimeve klimatike.
"Ata gjithashtu kishin një shkëmbim konstruktiv të pikëpamjeve lidhur me disa situata në rajon, duke përfshirë Jemenin, Libinë dhe procesin e paqes në Lindjen e Mesme, si dhe disa çështje shtesë me interes të përbashkët në pjesë të tjera të botës", shtoi Haq.
Operacioni "Burimi i Paqes", i nisur nga Turqia më 9 tetor, synon të eliminojë elementet terroriste të YPG/PKK-së nga veriu i Sirisë në lindje të lumit Eufrat në mënyrë që të sigurojë kufijtë e Turqisë, të ndihmojë kthimin e sigurt të refugjatëve sirianë dhe të garantojë integritetin territorial të Sirisë.
Guterres mori pjesë në Konferencën e Ndërmjetësimit në Stamboll, ku u mblodhën politikanë, diplomatë dhe të tjerë për të diskutuar teknikat e ndërmjetësimit dhe përdorimit të teknologjive të reja për t'u dhënë fund luftërave.
Në takim gjithashtu ishin të pranishëm edhe ministri i Punëve të Jashtme, Mevlüt Çavuşoğlu, shefi i komunikimeve të Presidencës së Turqisë, Fahrettin Altun, zëdhënësi i Presidencës İbrahim Kalın dhe kreu i Komisionit të Punëve të Jashtme të Parlamentit të Turqisë, Volkan Bozkır.
