Skulptori iranian Ali Mutii, me banim në Van të Turqisë, transformoi 600 kilogramë hekur që mblodhi nga tregtarët e skrapit në skulpturën "Përbindëshi i Liqenit Van", raporton Anadolu.
Mutii, i cili u largua nga Irani në vitin 2007 dhe u vendos në Irak, erdhi në Turqi në vitin 2016 dhe filloi të jetonte në Van pasi qëndroi në Irak për 9 vjet.
Ai ka qenë i interesuar për artin që nga fëmijëria dhe vazhdon të ndjekë artin e skulpturës në një punishte të vogël që hapi në Vendin e Marangozëve në lagjen Tuşba.
I njohur për mbështetjen e tij ndaj Projektit Zero Mbeturina, ai vendosi të bënte skulpturën "Përbindëshi i Liqenit Van" nga copa hekuri që mblodhi.
Në këtë kontekst, skulptori mblodhi materiale dhe brenda tre muajsh krijoi statujën "Përbindëshi i Liqenit Van", e cila është 5 metra e gjatë dhe 2 metra e lartë dhe është krahasuar me një dinozaur.
Statuja 600 kilogramëshe, e përfunduar pas një përpjekjeje të gjatë, i habiti ata që e panë në brigjet e liqenit Van.
"Ka dalë një vepër shumë e bukur"
Skulptori iranian për Anadolu Agency (AA) tha se ai siguron jetesën duke shitur figurat njerëzore dhe shtazore që ai dizajnon, si dhe lodra dhe zbukurime.
Skulptori, i cili deklaroi se ka krijuar shumë vepra dhe ka ekspozuar disa prej tyre, tha: "Gjatë kohës që jetoja këtu, dëgjova shumë thashetheme dhe histori rreth Përbindëshit të Liqenit Van. Më tërhoqi vëmendjen dhe vendosa të bëj një skulpturë të përbindëshit. Kërkova imazhe të përbindëshit në internet dhe gjeta shumë fotografi. Duke përdorur këto imazhe si udhëzues, bëra një skulpturë të Përbindëshit të Liqenit Van. Skulptura, e cila është 2 metra e lartë dhe 5 metra e gjatë, peshon 600 kilogramë".
"Në këtë skulpturë kam përdorur materiale të vjetra dhe copa të ndryshme hekuri. Çdo skulpturë që kam bërë ka një histori dhe të gjitha janë shumë të veçanta. Janë bërë me mund. E dua punën time dhe kryesisht siguroj jetesën duke shitur këto skulptura. Gjithashtu, ndonjëherë punoj si hekurpunues në ndërtim. Do të doja shumë që çdo institucion ta merrte dhe vlerësonte këtë skulpturë, pasi është një vepër shumë e vlefshme, unike për Vanin. Arrita ta përfundoja pas rreth tre muajsh punë. Punova shumë, por rezultati është një vepër e bukur. Njerëzit e pëlqyen shumë. Ata që e panë më përgëzuan", tha ai.
"Ndonjëherë nuk kthehej në shtëpi natën, mblidhte hekurishte."
Vajza e tij, Elvin, e cila ndihmoi babain e saj, tha: "Mendoj se babai im është shumë i talentuar. Një mbrëmje, ai na tha se donte të bënte një statujë 'përbindëshi!. Ne e gjetëm interesante dhe i thamë se e mbështesnim dhe i besonim. Ndonjëherë ai nuk kthehej në shtëpi natën, mblidhte metal. Blinte pjesë të vjetra automjetesh. Në fund, ai krijoi një vepër të bukur. Kjo është vetëm një nga dhjetëra veprat e babait tim".
