Di erdheja li Behra Spî da bandor li ser 69 welatiyan çêbû

Waliyê Muglayê Îdrîs Akbiyik ragihand di erdheja ku bi mezinahiya 5.8an ya ku di saet 02.17an da li Behra Spî çêbû, bandor li ser 69 welatiyan kir û ciwanekî 14 salî yê ku qeyrana panîkê derbas kir jî mir.

Walî Akbiyik ji nûçegihanê AAyê ra daxuyand ku erdhejeke bi mezinahiya 5.8an a ku navenda wê Behra Spî ye çêbû.

Akbiyik destnîşan kir ku erdhej 10.43 kîlomêtro dûrî navçeya Marmarîsê û 67.91 kîlomêtro di bin erdê da çêbû.

Walî Akbiyik diyar kir ku piştî erdhejê ekîban li qadê dest bi xebatan kirine û wiha got: "Heta niha erdhêjê bandor li ser 69 welatiyên me kir. Bi tevahî 55 welatiyan serî li nexweşxaneyan dane ku ji wan 10 kes bi ambulansê û 45 kes jî li ser piyan ji derva hatine nexweşxaneyê. 14 welatiyên me qebûl nekirine ku wan bibin nexweşxaneyê û li cihê bûyerê hatine dermankirin. Nexweşek jî li nexweşxaneyê hat razandin. Miayene û dermankirina 46 nexweşan li serwîsa acil dewam dike. 8 nexweş hatin taburcîkirin. Ewladekî me yê 14 salî yê ku di erdheja navçeya Fethiyeyê da qeyrana panîkê derbas kiriye û ew anîne nexweşxaneyê jî li hemberî hemû hewldanan ji mirinê nefilitî."

Akbiyik anî ziman ku piştî erdhejê li bajêr di binesaziya vejen, xaza siruştî, ava vexwarinê û kanalîzasyonê da rewşeke neyînî ya ku bandorê li ser jiyanê bike çênebû.

Walî Akbiyik got li tevahiya bajêr tu avahî hilneweşiya û li qadê xebat dewam dikin.