داودئۆغڵو چەند روونکردنەوەیەکی گرنگی لەبارەی ئەنقەرەوە دا

ئەنقەرە- AA

دوای کۆنگرەی پارێزگای ئەنقەرە، سەرۆکوەزیرانی تورکیا ئەحمەد داودئۆغڵو لەبارەی رۆژەڤی تورکیا وکۆبوونەوەکانەوە لێدوانی بۆ رۆژنامەنوسان دا .

داودئۆغڵو ئاماژەی بەوەدا کە بەهۆی ئەو قەیرانانەی لە چواردەوری تورکیا روودەدەن، وڵات رووبەڕووی مەترسییەکی گەورەی تیرۆر بووەتەوە. راشیگەیاند:" ئەمە دۆخێک نییە، کە تەنیا ئێمەی گرتبێتەوە، دۆخێکە دوای هێرشەکانی سەر پاریسی فەرەنسا و چەند وڵاتێکی ئەوروپیش رووبەڕووی بووینەتەوە، بەڵام هەڵبەت تورکیا تایبەتمەندیی خۆی هەیە، راستەخۆ بە ناوچەکەوە بەستراوەتەوە و ناوچەیەکی هەستیارە و جموجۆڵی مرۆیی تێدایە".

داودئۆغڵو لەبارەی ڕێوشوێنە ئەمنییەکانەوە گوتی:" لەم ماوەی دواییدا چەندین کۆبوونەوە لەبارەی ئاسایش ئەنجامدراون و لە کۆبوونەوەکان چەندین مەرج گۆرانکارییان بەسەردا هاتووە. بەمەبەستی سەقامگیری و گرتنەبەری ڕێوشوێنی پێویست لەسەرانسەری تورکیا چەندین گۆرانکاریی گرنگ کراون. هەروەها لەپێناو سەقامگیریی ناوچەکە، بەردەوامین لە هەڵسەنگاندنی ئەو رێکارانەی لەسەرانسەری تورکیا پێویستن".

سەرۆکوەزیران هەروەها ئاشکرای کرد لە ئیستانبوڵ و دوای هێرشە تیرۆریستییەکەی ئەنقەرە لەگەڵ سەرجەم بەرپرسانی ئەمنیدا بۆ ماوەی پێنج سەعات کۆبوونەوە. دواتر لەگەڵ بەرپرسانی ئەنقەرەشدا بۆماوەی پێنج سەعاتی تر کۆبوونەوەیەکی ئەنجام داوە .

داودئۆغڵو روونی کردەوە لەمەودوا لە هەر شارێکدا بەهەماهەنگی لەگەڵ پارێزگار، لەبارەی ئەو بارودۆخە ئەمنییەی دەگۆڕێت، باس لە ڕێوشوێنی پێویست بەرامبەر بە رووداوەکان دەکەن و میکانیزمێک جێبەجێ دەکەن و هەموو هەفتەیەک کۆبوونەوەی ئەمنی ئەنجام دەدەن.

سەرۆکوەزیران لەدرێژەدا گوتی هەرکاتێک لەهەر شارێک پێویستییەکی تایبەت سەری هەڵدا، سیستەمێکی ئەمنیی تازە پەیڕەو دەکەن و بەردەوام بۆ هەر رووداوێک لە ئامادەباشیدا دەبن.