عەلییەڤ و پوتین و سارکیسیان تاوتوێی قەرەباغیان کرد

سەرۆکی رووسیا ڤلادیمیر پوتین و سەرکۆماری ئازەربایجان ئیلھام عەلییەڤ و سەرکۆماری ئەرمینیا سێرجژ سارکیسیان بەمەبەستی تاوتوێی کێشەی قەرەباغ لە پیتەرسبێرگ کۆبوونەوە.

لە دوای کۆبوونەوەکەی ھەر سێ سەرۆکەکە، بەیاننامەیەکی ھاوبەش دەرکرا.

بەپێی ئەو بەیاننامەی کە لە سایتی فەرمی کرێملین بڵاوکراوەتەوە، عەلییەڤ و سارکیسیان جەختیان لە بەردەوامی قۆناغی ئاشتی لە ناوچەی قەرەباغ و سەقامگیری ناوچەکە کردووەتەوە.

لەم چوارچێوەیەش ھەردوو سەرکۆماری ئازەربایجان و ئەرمینیا ھاوڕابوونە لەسەر زیادکردنی ژمارەی چاودێرانی نەتەوە یەکگرتووەکان لە ناوچەی شەڕ و پێکدادانەکانی سنووری ھەردوو وڵات.

راشگەیەنرا کە عەلییەڤ و سارکیسیان بڕیارێکی ھاوبەشیان دەرکردووە لەسەر پێکھێنانی ژینگەیەکی لەبارە بەمەبەستی چارەسەرکردنی کێشەی قەرەباغ.

لە لایەکی دیکەش پوتین پێش کۆبوونەوەکە بە جیا لەگەڵ عەلییەڤ و سارکیسیان کۆبووەتەوە.