گوته‌بێژی كرێملین: "له‌ كاتی خۆیدا وه‌ڵامیان ده‌درێته‌وه‌"

مۆسكۆ - AA

گوته‌بێژی كرێملین دیمیتری پێسكۆڤ رایگه‌یاند كه‌ له‌ كاتی خۆیدا و له‌ به‌رژه‌وه‌ندی رووسیا وه‌ڵامی وڵاتانی ئه‌ندام له‌ ناتۆ و له‌ یه‌كێتیی ئه‌ورووپا ده‌درێته‌وه‌ به‌هۆی دیپۆرتكردنه‌وه‌ی دیپلۆماتكاره‌ رووسه‌كان.

له‌ وه‌ڵامی پرسیاری رۆژنامه‌وانان له‌باره‌ی دیپۆرتكردنه‌وه‌ی دیپلۆماتكاره‌ رووسه‌كان، پێسكۆڤ گوتی: "له‌ راستیدا ئه‌مه‌ بڕیارێكی بە کۆمەڵ بوو. ئه‌مه‌ ده‌رخه‌ری پشتیوانییه‌. پشتیوانییه‌ك بۆ له‌نده‌ن كه‌ بنه‌مای نییه‌".

پێسكۆڤ جه‌ختی له‌وه‌ كرده‌وه‌ كه‌ ئه‌و ده‌نگۆیانه‌ی ئاراسته‌ی رووسیا ده‌كرێن هیچ بنه‌مایه‌كیان نییه‌ و بێ به‌ڵگه‌ن، له‌باره‌ی ئه‌و وڵاته‌نەش كه‌ دیپلۆماتكاره‌ رووسه‌كانیان دیپۆرتكردوونه‌ته‌وه‌ گوتی: "له‌ كاتی خۆیدا وه‌ڵامیان ده‌درێته‌وه‌. هه‌موو شتێك به‌ جۆرێك كه‌ له‌ به‌رژه‌وه‌ندی رووسیادا بێت وه‌ڵام ده‌درێته‌وه‌".

پێسكۆڤ تیشكی خسته‌ سه‌ر ئه‌وه‌ی كه‌ كۆمه‌ڵگای نێوده‌وڵه‌تی هه‌مووی رووبه‌ڕووی رووسیا نه‌بۆته‌وه‌ و گوتی: "٢٠ یان ٣٠ وڵات ته‌نها به‌شێكن له‌ جیهان. كۆمه‌ڵگای نێوده‌وڵه‌تی ژماره‌یه‌كی زۆرتر وڵات له‌ خۆ ده‌گرێ. دووه‌م له‌ نێو ئه‌و وڵاتانه‌ی كه‌ پشتگیری له‌نده‌ن ده‌كه‌ن وڵاتی وایان تیادایه‌ كه‌ پێیان وایه‌ ئه‌و دیكۆمێنتانه‌ی له‌نده‌ن مۆسكۆی پێ تۆمه‌تبار ده‌كات لاوازن و به‌پێی پێویست نین".

وڵاتانی ئه‌ندام له‌ ناتۆ و یه‌كێتیی ئه‌ورووپا رووسیایان به‌ به‌رپرسیاری ژه‌هراویكردنی سیخوڕی پێشووی رووسی سێرگی سكریپاڵ و كچه‌كه‌ی به‌ گازی كیمیایی له‌قه‌ڵه‌م دا و بڕیاریاندا ژماره‌یه‌كی زۆر له‌ دیپلۆماتكارانی رووسی دیپۆرت بكه‌نه‌وه‌.