پاڵاوتنەکانی مۆندیالی ٢٠١٨ لە کیشوەری ئەورووپا

ئیستانبوڵ- AA

جۆش و خرۆشی قۆناغی پلەی ئۆف لەمیانی پاڵاوتنەکانی ئەورووپا بۆ جامی جیهانیی ٢٠١٨، سبەینێ دەستپێدەکاتەوە.

٤ هەڵبژاردەی دیکەی ئەورووپا دوای ئەوەی قۆناغی پلەی ئۆف دەبڕن، دەتوانن بگەنە کۆتاییەکانی مۆندیالی ٢٠١٨ کە رووسیا میوانداریی دەکات.

لە قۆناغەی پلەی ئۆفدا هەریەک لە هەڵبژاردەکانی ئێرلەندای باکوور-سویسرا، کرواتیا-یۆنان، دانیمارک-کۆماری ئیرلەندا و سوید-ئیتاڵیا رووبەڕووی یەکتر دەبنەوە.

لە کیشوەری ئەورووپا هەریەک لە هەڵبژاردەکانی فەڕەنسا، پرتوگال، ئەڵمانیا، سڕبیا، پۆڵەندا، ئینگلتەرا، ئیسپانیا، بەلجیکا و ئایسلەندا دوای ئەوەی ببوونە یەکەمی کۆمەڵەکانیان، بەشدارییان لە کۆتاییەکانی مۆندیالی ٢٠١٨دا مسۆگەر کردبوو.

رۆژی ١ی کانوونی یەکەم تیروپشکی گرووپەکانی مۆندیالی ٢٠١٨ لە مۆسکۆی پایتەختی رووسیا بەڕێوەدەچێت و بڕیارە یارییەکانیش لەنێوان ١٤ی حوزەیران بۆ ١٥ی تەمووزدا ئەنجامبدرێن.