دهۆك.. کردنەوەی چوارەمین پیشانگای پەرتووك

بەرپرسی چوارەمین پیشانگای پەرتووك لە دهۆك كەریم بیانی لە لێدوانێكیدا بۆ ئاژانسی ئانادۆڵۆ رایگەیاند "ماوەی چوار ساڵە ئەم پیشانگایە لە دهۆك دەكرێتەوە و، ئەمساڵیش وێرایی قەیرانی دارایی و نەبوونی بوودجە و وەستانی پرۆژەی چاپ و بڵاۆكردنەوە، بەڵام نەمان ویست پیشانگاكە بوەستێت و ئەمساڵیش كردمانەووە".

گوتیشی: "باری ئابووری فاكتەرێكە بۆ لەچاپ نەدانی پەرتووك و گەیاندنی بۆ دەستی خوێنەر و نەكردنەوەی پیشانگا، ئەمەیش كاریگەری راستەوخۆیی دەبێت لەسەر رێژەی خوێنەران لە دهۆك".

خاوەنی پەرتووكخانە ئەواب ئەحمەد، بۆ ئاژانسی ئانادۆڵۆ گوتی: "بەراورد بە پارێزگەكانی دیكەی هەرێمی كوردستان و وڵاتانی دراوسێی رێژەی خوێندنەوە لە دهۆك زۆر كەمە. بەڵام ئێمە لە هەوڵداین بە بەشداریكردن لەم جۆرە پیشانگایانە و داشکاندنی نرخی پەرتووك، حەزوخولیای خوێندنەوە لە نێو هاووڵاتییاندا بەرز بكەینەوە".

بەڕێوەبەری پەرتووكخانەكانی گشتیی دهۆك ئیسماعیل تەها بۆ ئاژانسی ئانادۆڵۆ گوتی: "لە ئێستادا نەخشەوپلانمان هەیە بۆ بەرزكردنەوەی ئاستی خوێنەرانی پەرتووك و داشكاندنی نرخی پەرتووكەكان و هێنانی ژێدەری زیاتر و ئەگەر ئەم نەخشەوپلانانە سەربگرن ئەوە رێژەی خوێنەر لە دهۆك بەرزدەبێتەوە".

لە سنووری پارێزگای دهۆك تەنها چوار پەرتووكخانەی گشتیی هەیە و ئەمەیش بە بەراورد لەگەڵ پارێزگاكانی دیكەی هەرێمی كوردستان بە بۆچوونی شارەزایان رێژەیەكی زۆر كەمە. چونكە لە سێ پارێزگاكەی دیكەی هەرێم 76 پەرتووكخانەی گشتی هەیە و ئەمەش كاریگەری لە سەر كەمی رێژەی خوێنەر لە دهۆك درووست كردووە.