سلێمانی-AA
بەیانیەکی هەینی بوو، دوای ئەوەی تەنیا چەند رۆژێک بوو لە وڵاتی بەریتانیا گەڕابوویەوە شاری سلێمانی کە بەمەبەستی وەرگرتنی چارەسەریی رووی کردبوویە ئەو وڵاتە، لەپڕێکدا هەواڵی کۆچی دوایی رێکخەری گشتی بزووتنەوەی گۆڕان بڵاو بوویەوە، ئەمەش زۆرێک لە لایەنگران و هاووڵاتییانی هەرێمی کوردستانی دڵتەنگ و خەمبار کرد.
لە ١٩ی ئایاری ٢٠١٧داو دوای نەخۆشکەوتنی و گەڕانەوەی بۆ هەرێمی کوردستان، بیرمەند و رۆژنامەنووس و سیاسەتمەداری هەرێمی کوردستان، نەوشیروان مستەفا ئەمین لە تەمەنی ٧٣ساڵیدا لە گردی زەرگەتەی شاری سلێمانی کۆچی دوایی کرد.
ئەمڕۆ کە سێ ساڵ بەسەر کۆچی دوایی نەوشیروان مستەفا ئەمیندا تێپەڕدەبێت، بەهۆی بڵاوبوونەوەی ڤایرۆسی کۆرۆنا و رێکارەکانی خۆپارێزی بە فەرمی یادی کۆچی دوای ئەو سەرکردەیە ناکرێتەوە و لیژنەی پاراستنی ئەرشیفەکەی نەوشیروان مستەفا رایدەگەیەنن بۆ رێزگرتن لە رێکارە تەندروستییەکان یادەکە ناکەنەوە.
"بزووتنەوەی گۆڕان بەبۆنەی ساڵیادەکەوە پەیامێک بڵاو دەکاتەوە"
بزووتنەوەی گۆڕان بۆ یادی کۆچی دوایی نەوشیروان مستەفا ئەمین راگەیەندراوێکی بڵاو کردەوە و تیایدا ئاماژەی بەوە کردووە کە لەهەموو کات زیاتر ئێستا بیری سیاسیی نەوشیروان مستەفا و دیدگاکانی بۆ دەربازبوون لەم دۆخە دژوارە و ئیدارەدانی تەنگەژەو قیرانەکان، پێویستیەکی هەنووکەییە.
لە راگەیەندراوەکەدا بزووتنەوەی گۆڕان ئاماژە بەوەشدراوە کە بەرەی گەندەڵکاران هێشتا بەهێزن و خەمی برسێتی و ئازاری هاووڵاتییانیان نییە، بێموچەیی، بێکاری، نادادپەروەریی، قۆرخکاریی و باڵادەستی حیزب بەسەر دامەزراوەکانی حکوومەتەوە لاشەی نیشتمانی وێران کردووە و پێویستە هەنگاوەکان بۆ کۆتاییهێنان بەو دۆخە دژوارانە، خێراتر و گشتگیر تر بکرێن تا لە ئاست پێداویستییەکانی ئەم قۆناغە و چاوەڕوانی هاووڵاتییاندا بێت.
هەر بەبۆنەی ساڵیادی کۆچی دوایی نەوشیروان مستەفاوە سەرۆکایەتی یەکێتی نیشتیمانی کوردستان پەیامێکی سەرەخۆشی بڵاوکردۆتەوە و هیوای خواستووە کە بە یەکخستنی ریزەکان لە پێناو خزمەتکردنی شایستهی خهڵكی كوردستان، رۆحی ئهوان و سەرجەم شەهید ئاسووده بكات.
لە پەیامەکەدا هاتووە، "لهم یادهدا سەری رێز و وەفا بۆ هزر و خهبات و قەڵەمی نیشتمانپەروەرێك دادەنەوێنین، کە بەدەم رێگای سهخت و دووری تێكۆشانهوه، گوڵچنی كولتوور و ئەدەب و مێژووی شۆڕشی کوردستانی کردووە. دوای خۆیشی، گهنجینهیهكی گهورهی سیاسی، میژوویی، كۆمهڵایهتی، و زمانهوانی بۆ جێهێشتووین."
"بهو هیوایهی یەکخستنی ریزەکانمان، رۆحی ئهوان و سەرجەم شەهیدەکان ئاسوده بكات"
لەبەشێکی دیکەی پەیامەکەدا هاتووە، یهكێتیی نیشتمانیی كوردستان، ههمیشه به چاوی وهفادارییهوه دهڕوانێته خهباتی كاك نهوشیروان و ههڤاڵهكانی لهناو یهكێتی، كه له پێناو ئازادی و دیموكراسی و دادپهروهری و مافی چارهی خۆنووسیندا، شۆڕشی نوێی گهلی كوردستانیان ههڵگیرساند."
سەرۆکایەتی یەکێتی لە پەیامەکەیدا دەڵێت، "ئهمڕۆ و نزیك به نیو سهده دوای ئهو رۆژگاره، كوردستان له ههمووكات زیاتر پێویستی به سیاسهتی حهكیمانهی مام جهلال و راشكاویی كاك نهوشیروانه و جێگهی خاڵیی ئهم دوو هاوڕێیهی خهبات، به روونی له تانوپۆی كوردهواریدا ههستی پێدهكریت. له یادمانه دوا ههنگاوی سیاسیی مام جهلال و كاك نهوشیروان، كاركردن بووه بۆ دروستكردنی سهركردایهتیی هاوبهشی یهكێتی و گۆران".
لە کۆتایی پەیامەکەدا سەرۆکایەتی یەکێتی دەڵێت،"ئهمڕۆ ئێمه دریژهدان بهو ههنگاوه، به ئهركێكی سهرهكی خۆمان دهزانین و خهباتی بۆ دهكهین. بهو هیوایهی یەکخستنی ریزەکانمان لە پێناو خزمەتکردنی شایستهی خهڵكی كوردستان، رۆحی ئهوان و سەرجەم شەهید و تێكۆشهرانی ئهم رێبازه ئاسووده بكات.
ژیاننامەی نەوشیروان مستەفا ئەمین
نەوشیروان مستەفا لە ٢٢ ی کانوونی یەکەمی ١٩٤٤ لە گەڕەکی سەرشەقامی شاری سلێمانی لە دایکبووە و لە تەمەنی ٧٣ ساڵیدا کۆچی دوایکرد.
خاوەنی دوو کوڕ و کچێکە بەناوەکانی چیا، نما و چرا.
نەوشیروان مستەفا وەك هاوڕێ نزیكەكانی دەگێڕنەوە سەرەتای شەستەكانی سەدەی ڕابردوو دەستی بە كاروچالاكی سیاسی كردووە، یەكەم وێستگەی ژیانی سیاسیشی یەكێتیی قوتابیانی كوردستان بووە.
قوتابخانەی سەرەتایی و ناوەندی و دواناوەندی لە شاری سلێمانی تەواوكردووە، لە ساڵی 1967 كۆلێژی زانستە سیاسییەكانی لە زانكۆی بەغدا تەواو كردووە، لە سەرەتای ساڵانی شەستەكانی سەدەی ڕابردووەوە لە ڕیزەكانی یەكێتی قوتابیانی كوردستان چالاكانە كاری كردووە.
لە ساڵانی ١٩٦٣ و ١٩٦٤ بۆتە ئەندامی سكرتاریەتی یەكێتیی قوتابیانی كوردستان، هەر لەو ماوەیەدا بۆتە ئەندام لە پارتی دیموكراتی كوردستان. لە ساڵی ١٩٦٧ بۆتە ئەندامی لقی سلێمانیی پارتی دیموكراتی كوردستان.
گۆڤاری رزگاری كە لە ساڵی ١٩٦٩ دا دەرچووە، نەوشیروان مستەفا خاوەنی ئیمتیازی ئەو گۆڤارە مانگانەیە بووە.
پاش بەیانی ١١ی ئازاری ١٩٧٠ نەوشیروان مستەفا و کۆمەڵێک هاوڕێی دووردەخرێنەوە لە سلێمانی بۆ خوارووی عێراق و پاشان لە بەغدا یەك دەگرنەوە.
ئیدی لەو سەردەمەدا نەوشیروان مستەفا بەرەو نەمسا بە مەبەستی خوێندن و دووركەوتنەوە لە هەڕەشەكانی ئەو سەردەمەی حكوومەتی عێراقی بە ڕێدەكەوێت كە لەو سەردەمەدا لەلایەن حكوومەتی عێراقییەوە سزای لە سێدارەدانی بۆ دەرچووە.
لە نەمسا پاش تەواوكردنی ماستەر، سەرقاڵی خوێندنی دكتۆرا دەبێت لە بواری یاسای نێودەوڵەتیی، بەڵام بۆ دامەزراندی یەكێتیی نیشتمانیی کوردستان واز لە خوێندنەكەی دەهێنێت و دەگەڕێتەوە كوردستان.
لێرە بەدواوە ئیدی نەوشیروان مستەفا وەك سەركردەیەكی دیار بە تەواوی دەردەكەوێت كە هەم سكرتێری كۆمەڵە و هەم جێگری سكرتێری گشتیی یەكێتیی نیشتمانیی كوردستان دەبێت.
نەوشیروان مستەفا، پێش ئەوەی بزووتنەوەی گۆڕان دابمەزرێنێت، جێگری سكرتێری گشتیی یەكێتیی نیشتمانیی كوردستان بوو.
لە ساڵی ٢٠٠٩دا دوای جیابوونەوەی لە یەکێتی نیشتیمانی کوردستان بزووتنەوەی گۆڕان دادەمەزرێنێت و دەبێتە رێکخەری گشتی بزووتنەوەکە.
ژیانی خێزانیی نەوشیروان مستەفا ئەمین
نەوشیروان مستەفا لە ساڵی ١٩٨١ لەگەڵ کچێکدا بەناوی شوعلە عەلی خێزانی پێكەوە ناوە، کە تەنیا سێ مانگ پێش کۆچیی دوایی خۆی هاوسەرەکەی لە ١٧ی ئازاری ٢٠١٧دا کۆچی دوایی دەکات.
نەوشیروان خاوەنی دوو كوڕ و كچێكە بەناوەكانی (نما، چیا، چرا).
نما كۆلێژی كارگێڕی و ئابووری لە لەندەن تەواوكردووە.
چیا، پاش تەواوكردنی كۆلێژ لە لەندەن ڕووی كردۆتە ئەمریكا بە مەبەستی خوێندنی ماستەر.
چرای كچیشی لە لەندەن لە كۆلێژی پزیشكی خوێندوویەتی.
كتێبە چاپكراوەكانی نەوشیروان مستەفا ئەمین
لە كەناری دانوبەوە بۆ خڕەی ناوزەنگ، دوخی سیاسی لە كوردستانی عێراق لە سالی١٩٧٥ تاكو ١٩٧٩، (كوردستان ـ زەرگەتە: ١٩٩٧)
پەنجەكان یەكتری دەشكێنن، دوخی سیاسی لە كوردستانی عێراق لە سالی ١٩٧٩ تاكو ١٩٨٣، (كوردستان ـ زەرگەتە: ١٩٩٧)
خولانەوە لە بازنە دا، دوخی سیاسی لە كوردستانی عێراق لە سالی ١٩٨٤ تاكو ١٩٨٨، (كوردستان: ١٩٩٩)
كورد و عەجەم، (كوردستان ـ زەرگەتە: ١٩٩٢)
حكوومەتی كوردستان: كورد لە گەمەی سوڤیەت دا، (كوردستان: ١٩٩٣)
میرایەتی بابان لە نێوان بەرداشی ڕوم و عەجەم دا، (كوردستان: ١٩٩٨)
كوردستانی عێراق: سەردەمی قەلەم و موراجەعات، ١٩٢٨-١٩٣٢(كوردستان ـ زەرگەتە: ٢٠٠٠)
ژیان، بەتەمەنترین روژنامەی كوردی ١٩٢٦ -١٩٣٨ (كوردستان ـ زەرگەتە ٢٠٠٢)
ژیان، چەند لاپەرەیەك لە مێژووی روژنامەوانیی كوردی ١٩٣٨ -١٩٥٨ (كوردستان ـ زەرگەتە: ٢٠٠٦)
كارەساتی هەكاری، (كوردستان ـ زەرگەتە: ١٩٨١)
كێشەی پارتی و یەكێتی، (كوردستان ـ زەرگەتە: ١٩٩٥)
ئێمە و ئەوان، (كوردستان ـ زەرگەتە: ٢٠٠٩)
بەدەم ڕێگاوە گوڵچنین، (چوار بەرگ)
ئەدەب و تاریخی كوردی، (كوردستان ـ زەرگەتە: ٢٠١٢)
news_share_descriptionsubscription_contact
