Вучиќ: Србија разгледува повеќе сценарија за заштита на енергетските интереси на земјата поради санкциите кон НИС

САРАЕВО (АА) - На состанокот со тимовите одговорни за енергетската стабилност и безбедност на земјата, разгледани се повеќе клучни прашања поврзани со моменталната состојба во енергетскиот сектор, соопшти денес претседателот на Србија, Александар Вучиќ, известува Анадолу.

Вучиќ на Инстаграм изјави дека добил детален извештај за состојбата на енергетските резерви и дека се анализирани различни сценарија за заштита на интересите на државата, граѓаните и економијата, поради санкциите на САД кон нафтената индустрија на Србија.

„Повторив дека актуелните предизвици бараат целосно внимание од сите институции и одговорни поединци. Очекувам максимални напори за ублажување на последиците од санкциите, со побрзи и навремени интервенции од страна на државата и координиран одговор на предизвиците“, рече Вучиќ.

Тој додаде дека ја нагласи важноста од редовно информирање на граѓаните и порача дека нема причина за загриженост, бидејќи се преземени сите потребни чекори за одржување на стабилно снабдување со гас и нафтени деривати.

„Поддршката на граѓаните и одговорното однесување на секој од нас се клучни за изнаоѓање одржливо решение што ќе обезбеди стабилност во снабдувањето со клучни извори на енергија“, рече Вучиќ.

Министерката за рударство и енергетика Дубравка Ѓедовиќ Хандановиќ во изјава по состанокот потсети дека Србија одобрила разговори со сите заинтересирани страни за продажба на мнозинскиот удел во НИС, и во случај да биде принудена, државата ќе донесе некои тешки одлуки.

Министерката не прецизираше дали овие одлуки ја вклучуваат и национализација на НИС, што српскиот претседател го отфрли во претходните изјави.

На 18 ноември, Нафтената индустрија на Србија (НИС) поднесе ново барање до Канцеларијата за контрола на странски средства (OFAC) на Министерството за финансии на САД за издавање посебна лиценца со која се бара овозможување на непречено работење.

Со претходната лиценца од 14 ноември, со важност до 13 февруари 2026 година, одобрени се преговори меѓу акционерите и другите заинтересирани страни за промена на сопственичката структура на НИС.

САД на 9 октомври воведоа санкции кон НИС поради нејзиното мнозинско руско сопствеништво.