АТИНА (АА) - Шумскиот пожар што избувна во Кератеа, на околу 50 километри од Атина, главниот град на Грција, ги зафати населените места, известува Анадолу.

Министерството за животна средина и цивилна заштита на Грција испрати итна порака до граѓаните со барање да се евакуираат некои населени места како Палиокамариза, Лавриотики, Маркати, Плака и Панорама кај Кератеа.

Од кабинетот на градоначалникот на Лавриотики предупредија дека шумскиот пожар веќе зафатил куќи во тој регион.

Пожарникарите се обидуваат да го изгаснат пожарот по воздушен и копнен пат, но силните ветрови ги попречуваат напорите за гаснење.

Градот Кератеа се наоѓа во ридовите во југоисточниот дел на полуостровот Атика, шест километри западно од брегот на Егејското Море.