Започна состанокот на лидерите на БиХ, Србија и Хрватска со министрите за надворешни работи

МОСТАР (АА) - Во Мостар е во тек средба на претседавачот и членовите на Претседателството на Босна и Херцеговина, Драган Човиќ, Бакир Изетбеговиќ и Младен Иваниќ и претседателите на Хрватска и Србија, Колинда Грабар-Китаровиќ и Александар Вучиќ, со министрите за надворешни работи на трите земји, јавува Аnadolu Agency (AA).

По трилатералниот состанок на членовите на Претседателството на БиХ и претседателите на двете соседни земји, што се одржа зад затворени врати во Канцеларијата на хрватскиот член на Претседателството во Мостар, започна состанокот со министрите за надворешни работи на Босна и Херцеговина, Србија и Хрватска, Игор Црнадрк, Ивица Дачиќ, и Марија Пејчиновиќ-Буриќ.

Во попладневните часови се планира обраќање до претседавачот на Претседателството на Босна и Херцеговина, Драган Човиќ, на претседателката на Хрватска, Колинда Грабар-Китаровиќ, и претседателот на Република Србија, Александар Вучиќ.

Човиќ претходно изрази очекување дека состанокот во Мостар ќе биде продолжение на претходните разговори што беа одржани во Белград и Загреб.

Се работи за, како што рече, решавање на меѓудржавните прашања, вклучувајќи го и граничното прашање, но исто така, и европскиот пат.