Иванов ќе учествува на состанокот на лидерите од Брдо-Бриони Процесот

СКОПЈЕ (АА) - Претседателот на Република Македонија, Ѓорге Иванов, утре ќе учествува на Состанокот на лидерите од Брдо-Бриони Процесот, што ќе се одржи во Брдо кај Крањ, Република Словенија, пренесува Anadolu Agency (AA).

Според соопштението од кабинетот на претседателот на Република Македонија, предвидено е претседателот Иванов да се обрати на пленарната сесија на состанокот, а ќе одржи и повеќе билатерални средби.

„Се очекува на состанокот на лидерите од Брдо - Бриони процесот да бидат опфатени клучните теми и аспекти во контекст на интеграцијата на регионот во Европската унија и да бидат разменети мислења и информации за актуелните состојби и предизвици во регионот на југоисточна Европа", се вели во соопштението.

На средбата, иницирана од претседателот на Република Словенија, Борут Пахор и од претседателот на Република Хрватска, Колинда Грабар Китаровиќ, е најавено учеството на претседателот на Сојузна Република Германија, Франк Валтер Штајнмаер, на претседателот на Република Србија, Александар Вучиќ, претседателот на Црна Гора, Филип Вујановиќ, претседателот на Република Косово, Хашим Тачи, претседателот на Република Албанија, Бујар Нишани и членот на Претседателството на Босна и Херцеговина, Драган Човиќ.