ПРИШТИНА (АА) - Конститутивната седница на косовското Собрание е прекината по четврти пат за именување на претседателот на деветтиот состав на законодавниот дом, јавува Анадолу.

На седницата, пратеникот од Движењето Самоопределување, Глаук Коњуфца, рече дека за претседател го имаат истиот предлог, Албулена Хаџиу.

Но, бидејќи, како што рече Коњуфца, политичките партии се изјаснија дека нема да ја поддржат Хаџиу за претседателка на Собранието, тој рече дека е потребно дополнително време за консултации:

„Мислам дека оваа политичка ситуација не може да се реши освен со политички договор. Без креирање мнозинство во Собранието за претседател, нема да може да се формира самото Собрание“, нагласи Коњуфца.

По неговото обраќање, претседавачот на Авни Дехари ја прекина седницата, закажувајќи нова за среда во 10 часот.

Лидерот на Демократската партија на Косово (ПДК), Мемли Красниќи, по неуспехот на седницата изјави дека тоа е ситуација без преседан и не доликува на институција како што е Собранието на Косово.

Истакна дека Движењето Самоопределување има право да предлага претседател на Собранието, но не и да го наметнува.

Тој рече дека најголемата партија мора да најде друг кандидат.

Според Красниќи, кандидатката Хаџиу „под никакви околности и во ниту еден момент“ нема да ја има поддршката од ПДК, со образложение дека потфрлила како министерка за правда за време на нејзиниот мандат.

И лидерот на Демократската лига на Косово (ЛДК), Лумир Абдиџику, пред почетокот на седницата изјави дека нема да гласаат за кандидатката на Самоопределување за претседателка на Собранието, пратеничката Албулена Хаџиу.

Тој го повтори ставот дека ќе гласаат против, исто како и претходно.

Од потребните минимални 61 глас, Албулена Хаџиу доби 57 гласа за претседател на косовското Собрание, 48 од Движењето Самоопределување и 9 од пратениците од заедниците.