Косовската полиција проверува пет локации во северниот дел на земјата поврзани со нападот во Бањска

ПРИШТИНА (АА) - Косовската полиција соопшти дека врши проверки на пет различни локации во северниот дел на територијата на Косово, кои се поврзани со нападот врз косовската полиција во селото Бањска во Звечан на 24 септември, пренесува Анадолу.

„Денес, на 29.9.2023 година, косовската полиција ја спроведува наредбата на надлежниот суд за проверки на пет локации во три општини на северот на Косово. Овие операции се спроведуваат во врска со неодамнешните настани што се случија во селото Бањска“, се наведува во соопштението на полицијата.

Како што соопшти полицијата, полициската акција продолжува од надлежните единици на косовската полиција во присуство на обвинителот на Специјалното обвинителство на Косово.

„Во оваа прилика косовската полиција ги известува граѓаните дека не треба да се грижат. Овие контролни наредби се спроведуваат во координација со ЕУЛЕКС и КФОР“, се наведува во соопштението.

На 24 септември, во раните утрински часови, по напад на тешко вооружена група од над 30 лица кон единицата на косовската полиција, околу 3 часот по полноќ беше убиен полицаецот Африм Буњаку.

Шефовите на државните институции на Косово го сметаат српскиот претседател Александар Вучиќ за одговорен за нападот што се случи во Бањска врз полициската единица.

Нападот врз косовската полиција го осудија и Европската Унија и САД.