Fatjon Cuka
08 Септември 2022•Ажурирај: 09 Септември 2022
ТИРАНА (АА) - Претседателот на Албанија, Бајрам Бегај, со државни почести го пречека италијанскиот претседател Серџо Матарела, јавува Агенција Анадолија (АА).
Двајцата претседатели одржаа тет-а-тет средба, а по меѓуделегациската средба одржаа заедничка прес-конференција.
Бегај нагласи дека Албанија и Италија со векови имаат стабилни врски, и дека се пријателски земји и блиски не само од географски, туку и од историски, културолошки, духовен и човечки аспект.
Тој истакна дека врската меѓу двете земји покажува дека двата народа ќе продолжат да ги поддржуваат мирот, добрососедството, братската солидарност и заедничкото патување кон подобри европски вредности.
Бегај рече дека Италија во својата надворешна политика како приоритет ја има интеграцијата на Западен Балкан и ја поддржува политиката за проширување на ЕУ.
„Со претседателот [Матарела] укажавме на важноста на ЕУ и НАТО во регионот. Земјите членки на Европската Унија треба да му помагаат на Балканот“, истакна тој.
„Присуството на КФОР во Косово го сметаме за многу важно за стабилноста на регионот. Ова присуство одразува мир и стабилност“, додаде Бегај.
Од друга страна, италијанскиот претседател Матарела нагласи дека двете земји имаат историско пријателство, многу силен билатерален дијалог.
„Врската меѓу Италија и Албанија се зголемува и се храни и понатаму од големото присуство на албанската заедница во Италија, како и од италијанската заедница во Албанија“, рече Матарела.
Тој истакна дека стратешкото партнерство меѓу двете земји е силно и од економски аспект, бидејќи, како што рече, нивната економска размена е многу силна.
„Знаеме дека иднината на Албанија е во Европа и без Западен Балкан, обединувањето на континентот ќе биде нецелосно“, додаде Матарела.
Според него, ситуацијата во Украина предизвикува загриженост, а Италија продолжува со поддршката на Украина, на нејзината независност, суверенитет и територијален интегритет.
