Associated Press
19 Ноември 2023•Ажурирај: 21 Ноември 2023
СОФИЈА (АА) - Бурен ветар, силен дожд и снег денес зафатија голем дел на Бугарија, одземајќи два животи, нанесувајќи сериозна штета и нарушувајќи го снабдувањето со електрична енергија во градовите и селата, соопштија бугарски официјални лица, известува Анадолу.
Жителите на источна Бугарија, која е најтешко погодена од бурата, изјавија дека никогаш не доживеале такво невреме.
Вонредна состојба е прогласена во црноморскиот град Варна, каде власта објави дека екстремните временски услови претставуваат сериозен ризик за населението.
Приморскиот град Варна го зафати бурен ветер и интензивен дожд измешан со снег.
Канцеларијата на градоначалникот соопшти дека во сите општини на Варна е пореметено снабдувањето со електрична енергија, а клучните патишта се блокирани од соборени дрвја и гранки.
Упатен е повик до населението да остане дома и да не ги користи возилата, освен во итни случаи.
Меѓународниот аеродром Варна беше отворен, но има одложени и откажани летови, соопштија официјални претставници на аеродромот.
Полицијата во саботата објави дека животот го загубил маж откако неговото комби удрило во соборено дрво на главниот булевар во Софија, главниот град на Бугарија, додека во Варна, жена починала веднаш по ударот здобиен од гранка што се скршила од дрво.
Бугарските метеоролози денес објавија дека предупредувањето за опасно време ќе дојде до источните делови на Бугарија, со удари на ветер со брзина до 125 километри на час.
Се очекува силниот дожд поради падот на температурата да премине во снег.
