Невреме предизвика поплави во областа Тет во Албанија

Интензивните врнежи од дожд во изминатите часови предизвикаа поплави и други проблеми во познатата туристичка област Тет, во округот Скадар, пренесува Анадолу.

Според извештаите, излевањето на помалите реки од нивните корита предизвикало водата да навлезе во неколку деловни објекти во оваа област, стигнувајќи и до просториите во близина на гостинските куќи наменети за туристи.

Исто така, се наведува дека проблеми има и со снабдувањето со електрична енергија поради лошите временски услови.

Во меѓувреме, невремето што ја зафати земјата во изминатите часови предизвика проблеми и остави без електрична енергија и неколку административни единици во Кукс, Хас и Тропоја.

Според Институтот за геонауки на Албанија, денеска и утре се очекуваат интензивни до локално многу интензивни врнежи во окрузите Скадар и Леж, додека во окрузите Кукс, Дебар, Драч, Тирана и Елбасан се очекуваат умерени до локално интензивни врнежи.