Синдикатот на „Хјундаи Мотор“ со прв целодневен штрајк по една деценија поради застој во преговорите за платите

Синдикатот на „Хјундаи Мотор“ започна целодневен штрајк денес, со што го запре производството во главните јужнокорејски фабрики на производителот на автомобили бидејќи преговорите за платите и условите за работа останаа во ќор-сокак, јавува Анадолу.

Штрајкот е прв од 2016 година во кој вработените во филијалата на „Хјундаи Мотор“ на Синдикатот на металски работници на Кореја организираа осумчасовен штрајк за секоја смена, објави „Кореја хералд“.

Производството беше запрено во фабриките во Улсан, Асан во покраината Јужен Чунгчеонг и Џонџу во покраината Северен Џеола, при што не работеа и утринските и попладневните смени.

Учествуваа околу 39.000 членови на синдикатот, вклучително и производствени и канцелариски работници.

Синдикатот организираше делумни штрајкови откако започнаа преговорите за платите на 6 мај. Процените на индустријата сугерираат дека прекините резултирале со загуби во производството од околу 55.200 возила, што е еквивалентно на повеќе од 2,3 билиони вони (1,66 милијарди долари) во потенцијална продажба.

Дополнителни четиричасовни штрајкови се планирани за понеделник и вторник.

Преговорите продолжија во понеделникот по пауза од повеќе од 40 дена, но повторно завршија без договор.

Двете страни остануваат поделени околу платите, враќањето на отпуштените работници и продолжувањето на возраста за пензионирање. Синдикатот, исто така, бара заштита на работното место поврзана со вештачката интелигенција, пократка работна недела и повисоки бонуси.