Сириски сликар по шест години поминати во затвор со изработка на мозаик сведочи за тортурата на режимот на Асад

АЗАЗ

- ОМЕР КОПАРАН

Сирискиот уметник Абдурезак Тавил шест години поминал во затворите на режимот на Башар ал Асад, а по излегувањето на слобода со ситни камчиња прави мозаик со кој ја прикажува тортурата која ја преживеал зад затворските решетки, јавува Агенција Анадолија (АА).

Тавил како трговец бил заробен во 2013 година во Дамаск и силите на режимот на Асад го притвориле под обвинение дека ги поддржува опозициските и антирежимските групи.

Додека бил заробен, 46-годишниот Тавил ги загубил родителите убиени во режимските воздушни напади, а во јуни минатата година е ослободен и оттогаш живее во Африн, кој е под контрола на сириската опозиција.

Иако успеал да пронајде свој дом, да се ожени и да започне нов живот на периферијата на Африн, Тавил никако од сеќавање не може да ја исфрли тортурата која ја преживеал за време на престојувањето во затворите на режимот на Асад.

Тавил моментално живее продавајќи мозаици кои ги изработува во својата градина, а меѓу темите за неговите мозаици се и сцени на тортура, загинати пријатели, но и некои лица кои го малтретирале во затворот.

Во разговор за АА, Тавил изјави дека првата година на заробеништво ја поминал во затворот „Мезе“, а дека останатите пет години бил во затворот „Адра“. Двата затвора се наоѓаат во Дамаск.

„Невозможно е да се заборави она што го преживеав и го видов во тие режимски затвори. Сите бевме жртви на голема тортура. Сликар сум и во памтењето ми се длабоко врежани портретите на пријателите од затворите, но и на злосторниците што нѐ мачеа“, изјави Тавил.

Тој изјави дека изработил и мозаик на портрет на едно лице од затворот кое најмногу го малтретирало и кое усмртило двајца негови пријатели.

„Во текот на шест години во затворот не успеав да го дознаам неговото име, но неговото лице и понатаму ми е пред очите, неговите очила, цигарата во уста и сето зло кое ми го направи се длабоко врежани во моето сеќавање“, изјави Тавил.

Според податоците на извор на сириската опозиција, моментално во затворите и истражните центри на режимот на Асад во Сирија се наоѓаат најмалку половина милион притвореници. Само ретките успеваат да добијат сила да сведочат за тортурата која ја преживеале зад решетки.