СЗО: Првите резултати од вакцината за заштита од Ковид-19 кон крајот на оваа година

ЖЕНЕВА

Светската здравствена организација (СЗО) наведе дека резултатите од тестирањата на некои кандидати за вакцина за заштита од новиот вид коронавирус ќе бидат готови до крајот на оваа година, пренесува Агенција Анадолија (АА).

Главниот експерт на научната делегација на СЗО, д-р Соумја Сваминатан, се осврна на прашањата за тоа кога ќе започне да се произведуваат 35-те вакцини, кои сѐ уште се тестираат на луѓето во светот, велејќи дека за време на испитувањето и производството на вакцината се потребни податоци и човечки ресурси.

„Мораме да имаме на ум дека за клиничките испитувања против Ковид-19 треба време. Не можеме да се брзаме со тоа“, изјави Сваминатан.

Сваминатан појасни дека десетици илјади луѓе треба да се пријават за учествување во клинички испитувања за да се направи безбедна и ефикасна вакцина.

Мајк Рајан, директорот на програмата на СЗО за вонредни состојби, го сврте вниманието на конкуренцијата кога станува збор за работата на вакцината.

„Тоа е трка. Трка против вирусот и трка за спасување животи. Тоа не е трка меѓу компаниите. Тоа не е трка меѓу државите. Тоа е трка за поддршка на јавното здравство и поддршка на најсигурен и најефикасен можен начин“, изјави Рајан.