Furkan Abdula
09 Ноември 2022•Ажурирај: 10 Ноември 2022
СКОПЈЕ (АА) - Министерот за надворешни работи на Северна Македонија, Бујар Османи, денеска, во рамки на регионалната посета на балтичките земји, оствари средба со неговиот домаќин, министерот за надворешни работи на Литванија, Габриелиус Ландсбергис, пренесува Агенција Анадолија (АА).
Според соопштението на МНР на Северна Македонија, возвратната посета на Литванија се реализира на покана на литванскиот министер Ландсбергис, кој е воедно и домаќин на Вториот форум на високо ниво за иднината на демократијата, што се одржува во Вилнус.
„На средбата беше потврден динамичниот политички дијалог кој оваа година резултира со две билатерални посети во Скопје и Вилнус и претставува охрабрување за градење поблиски односи и партнерство. Во изминатите три децении, споделувајќи заеднички европски вредности, Северна Македонија и Литванија посветено градат мостови на пријателство и соработка, но бараат и решенија за справување со заедничките предизвици“, се вели во соопштението.
Османи се заблагодари за конзистентната и јасна поддршка на Литванија во однос на европската интеграција на Северна Македонија, како и за артикулирањето на потребата од стабилен и демократски Западен Балкан и негово што поскоро пристапување во Европската Унија.
„Фактот што Литванија е дел од групата на пријатели на проширувањето е многу значаен и охрабрувачки за Северна Македонија“, потенцира Османи.
Во овој контекст Османи брифира за тековниот скрининг-процес како особено значајна фаза во процесот на пристапните преговори со ЕУ, како и за активностите кои претстојат во наредниот период.
„Истовремено, новата динамика на геополитичките случувања, како последица на војната во Украина, наметнува силна потреба од единство и поблиска соработка меѓу Европската Унија и Алијансата“, се нагласува во соопштението.
„Зајакнувањето на Источното крило на НАТО-Алијансата и нашата обединетост како НАТO-сојузници во однос на одвраќањето и одбраната на секоја педа од територијата на земјите членки на НАТО е придонес кон глобалната, регионалната и безбедноста на секоја поединечна земја“, истакна Османи.
Од друга страна, Ландсбергис изрази уверување и подготвеност дека Литванија ќе продолжи силно да ја поддржува Република Северна Македонија, со уверување дека европските интеграции се силна движечка сила на реформските процеси бидејќи поттикнуваат позитивна промена, просперитет и стабилност.
Ландсбергис брифира за состојбите во Балтикот и безбедносните ризици во непосредното соседство, предизвикани од руската агресија врз Украина, при што ја реафирмира потребата од едногласна солидарност за поддршка на украинските граѓани кои се борат за слобода дома, но и пошироко.
„Во овој контекст, Литванија го реафирмира ставот дека целосната усогласеност на Северна Македонија со заедничката и надворешна безбедносна политика на ЕУ за примена на санкциите кон Русија високо се цени од официјален Вилнус, како чекор кој го потврдува нашето единство и солидарност“, се додава во ова соопштение.
Двајцата министри разменија мислења за развојот на состојбите во Западен Балкан, како и за неодложната потреба од дијалог и меѓусебно почитување за изнаоѓање прифатливи решенија за затворање на отворените прашања.
Министерот Османи брифира и за идното претседавање на Северна Македонија со ОБСЕ во 2023 година, изразувајќи надеж за блиска соработка и поддршка од пријателска Литванија.
