Австралиска авијациска компанија изврши ретка медицинска евакуација од Антарктикот

Австралиски тим успешно спроведе ретка зимска медицинска евакуација на американски учесник во експедиција на Антарктикот, објави денес Австралиската радиодифузна корпорација (ABC), јавува Анадолу.

Австралиската авијациска компанија „Скајтрејдерс“ соопшти дека ангажирала авион „Ербас А319“ по итното барање за помош што го добила кон крајот на минатиот месец.

По првичниот обид што бил одложен поради лошите временски услови, авионот полетал од Хобарт на 31 јули и слетал на американската станица „Мекмердо“ на Антарктикот во темнина и екстремно ниски температури.

Од компанијата наведоа дека екипажот работел во исклучително тешки услови, при температури до минус 43 Целзиусови степени, и безбедно го пренел пациентот пред влошувањето на временските услови.

Авионот, познат како „Сноубрд 1“, дента слетал во Крајстчерч, Нов Зеланд, каде што пациентот бил хоспитализиран.

Не се објавени детали за околностите што довеле до медицинската евакуација.

Американската Национална научна фондација (НСФ) за Еј-би-си изјави дека побарала помош од Австралиската антарктичка дивизија и Одбранбените сили на Нов Зеланд за транспорт на учесник во Програмата на САД за Антарктикот (УСАП) до Крајстчерч, каде што му била обезбедена итна медицинска помош.