Азербејџанскиот претседател и израелскиот министер за надворешни работи разговараа за билатералниот бизнис-форум

МОСКВА (АА) - Азербејџанскиот претседател Илхам Алиев денес на состанокот во Баку разговараше со израелскиот министер за надворешни работи Гидеон Саар во врска со подготовките за претстојниот азербејџанско-израелски бизнис-форум, јавува Анадолу.

„За време на разговорот беше изразено задоволство во однос на средбата меѓу претседателите на Азербејџан и Израел што се одржа пред неколку дена во Давос, на која беа разгледани прашања поврзани со билатералната агенда“, се вели во соопштението од прес-службата на Алиев.

Беше нагласено дека односите меѓу двете земји успешно се развиваат во различни области, вклучително трговијата и економијата, енергетиката, туризмот и други сектори.

„Гидеон Саар изјави дека за време на неговата посета бил придружуван од претставници на големиот бизнис и деловната заедница и нагласи дека претстојниот азербејџанско-израелски бизнис-форум ќе придонесе за развој на трговските и економските односи меѓу двете земји“, се вели во соопштението.

Двајцата претставници, исто така, ја пофалија меѓувладината комисија во градењето на билатералните односи.

„Тој (Саар) му се заблагодари на претседателот Илхам Алиев за грижата за еврејската заедница во Азербејџан на државно ниво“, се вели во соопштението.

Се очекува Саар подоцна во текот на денот да има неколку средби во Баку, вклучително и со азербејџанскиот колега Џејхун Бајрамов, а потоа ќе отпатува во Казахстан.