Şahin Demir
26 Август 2026•Ажурирано: 26 Август 2026
Евентуална идна војна со САД би можела да се прошири низ целиот регион и да ги вовлече во конфликтот енергетската и комуникациската инфраструктура, предупреди денес портпаролот на иранската армија, јавува Анадолу.
Бригадниот генерал Мухамад Акрамнија за полудржавната новинска агенција „Мехр“ изјави дека Иран и претходно предупредил дека секоја „погрешна процена“ на неговите противници ќе предизвика непосреден одговор и би можело да се прошири географскиот опфат на конфликтот.
„Можно е идната војна да опфати нови боишта“, изјави Акрамнија.
Тој посочи на теснецот Баб ел-Мандеб и американска база во Сирија, наведувајќи дека и двете локации станале дел од конфликтот иако претходно биле надвор од неговиот географски опфат.
„Денес низ целиот регион постојат закани и ние имаме капацитети да се спротивставиме и да се справиме со нив“, рече тој.
Акрамнија изјави дека во можна идна војна би можело да бидат вклучени и нови подрачја на конфронтација, меѓу кои и енергетската и комуникациската инфраструктура низ регионот.
Тој конкретно ја посочи енергетската инфраструктура и комуникациските врски што во голема мера минуваат по морското дно во водите покрај Иран и Арапскиот Полуостров, како и низ Оманскиот Залив.
„Каде и да има непријателот интереси, во случај на агресија, тие би можеле да влезат во рамките на легитимни цели на вооружените сили на Исламската Република Иран“, рече тој.
Акрамнија, исто така, го повика Катар да ги засили напорите за утврдување на судбината на тројца ирански пилоти што се водат како исчезнати во иранската воздушна операција против американска база во Катар на 2 март.
Тој изјави дека два ирански авиона „Сухој“ ја погодиле базата, пред да бидат соборени при враќањето. Телото на еден од четворицата пилоти, Маџид Каземи, подоцна било пронајдено, а тројца сè уште се водат како исчезнати.
Катар негира дека ги држи тројцата пилоти, наведувајќи дека неговите тимови за пребарување и спасување ги пронашле посмртните останки на еден пилот, но дека нема докази оти другите биле заробени.
Изјавите доаѓаат во услови на конфликт меѓу Иран и САД, кој започна на 28 февруари со американски и израелски воени напади врз Иран, а потоа се прошири низ регионот откако Техеран возврати со напади врз американски воени позиции.
Подоцна во конфликтот беа вклучени неколку регионални фронтови и беше нарушен поморскиот сообраќај, а Иран и САД, со посредство на Катар и Пакистан, на 18 јуни потпишаа меморандум за разбирање, со цел да се стави крај на борбите и да се создадат услови за преговори.
Оттогаш Техеран го обвинува Вашингтон дека не го спровел целосно меморандумот, а Катар и Пакистан продолжуваат со дипломатските напори за договор меѓу двете страни.
