Велика Британија го осуди упадот на израелските сили во објект на УНРВА во окупираниот Источен Ерусалим

Британскиот министер за Блискиот Исток денес го осуди насилниот упад и преземањето на Центарот за обука на Агенцијата на ОН за палестински бегалци (УНРВА) во окупираниот Источен Ерусалим од страна на израелските сили, оценувајќи го потегот како „скандалозен“, јавува Анадолу.

Насилниот упад и наводното преземање на Центарот за обука на УНРВА во Каландија во Ерусалим е „скандалозно“, бидејќи овој објект на ОН на генерации палестински бегалци им овозможувал образование и можности, напиша Стивен Доути на американската платформа за социјални медиуми Х.

„Израел мора да ги почитува своите обврски и неповредливоста на просториите на ОН“, додаде Дoути.

Израелските сили вчера го евакуираа персоналот од објектот на УНРВА, го презедоа комплексот и го истакнаа израелското знаме во неговиот двор. Израелските сили, исто така, беа распоредени околу бегалскиот камп Каландија и Кафр Акаб, извршувајќи рации, претреси и теренски испрашувања на Палестинци.

Во соопштението, УНРВА соопшти дека „недвосмислено го осудува овој неовластен и длабоко загрижувачки упад“ во Центарот, наведувајќи дека влегувањето на вооружени безбедносни сили во објект на ОН, без одобрение или согласност од Обединетите нации, е „неприфатливо“.

Се додава дека станува збор за објект на ОН „заштитен со привилегиите и имунитетите што ѝ се доделени на Организацијата согласно со меѓународното право. Неговата неповредливост мора целосно да се почитува“.